Darhan Satybaldy Almatynyń sanıtarlyq ahýalyna baqylaýdy kúsheıtýdi tapsyrdy

ALMATY. KAZINFORM – Bul týraly Almaty ákimi qala ákimdiginde «Taza Qazaqstan» ekologııalyq baǵdarlamasynyń júzege asyrý barysyna arnalǵan jıyn barysynda aıtty.

Jıynda Darhan Satybaldy sanıtarlyq tazalyq pen ekologııalyq mádenıetti damytý qalanyń basty basymdyqtarynyń biri ekenin atady.

Onyń aıtýynsha, bul baǵyttaǵy jumys júıeli túrde júrgizilýge tıis. Ákim ásirese turǵyndardyń bastamasyn, jastar qozǵalystaryn qoldaý men ekologııalyq belsendilikti keńinen nasıhattaýdyń mańyzyna toqtaldy.

18-25 qazan aralyǵynda Almatynyń barlyq segiz aýdanynda senbilik ótti.

Іs-sharaǵa memlekettik organdardyń, kommýnaldyq qyzmetterdiń, bıznes qurylymdarynyń ókilderi men belsendi azamattar atsalysty. Barlyǵy 8 myńnan astam adam jáne 561 arnaıy tehnıka jumyldyrylyp, 9 myń tekshe metrden asa qoqys shyǵaryldy. Sonymen qatar 2,5 myńnan astam aǵash – úıeńki, qaraǵaı, shegirshin men qaraǵan kóshetteri egildi.

Osy aptada «Aıýsaı» vızıt-ortalyǵy aýmaǵynda prokýratýra jáne ulttyq park ókilderi senbilik ótkizedi.

«Jasyl aýla» jobasynyń kúzgi kezeńinde kópqabatty úılerdiń turǵyndaryna 528 kóshet – 409 aǵash pen 119 buta taratyldy.

«Jasyl el» jastar eńbek jasaqtarynyń maýsymdyq jumysy qorytyndylanyp, Almaty shtaby respýblıka boıynsha úzdik dep tanyldy. Eń belsendi 20 múshesine syılyqtar berildi. Sondaı-aq, qalada ótken Plastic Hunt aktsııasy barysynda 25 keli plastık qaldyq jınaldy. Kelesi is-shara qarasha aıynyń sońynda ótedi.

Jıyn barysynda ákim turǵyndardyń ótinishine der kezinde, sapaly ári naqty jaýap berýdi, formaldy tásilge jol bermeýdi tapsyrdy.

Darhan Satybaldy almatylyqtardy týǵan qalasynyń tazalyǵyn saqtaýǵa belsene atsalysýǵa shaqyryp, kóshe men aýla, sondaı-aq qoǵamdyq orynnyń sanıtarlyq ahýalyna baqylaýdy kúsheıtýdi tapsyrdy.