Darhan Myńbaı: Prezıdent maqalasy - Táýelsizdiktiń 30 jyldyǵynyń qulaq kúıi
«Memleket basshysy Qasym-Jomart Toqaev «Táýelsizdik bárinen qymbat» atty maqalasynda azattyqtyń qadir-qasıetin, ult tarıhynyń mán-mańyzyn, qundylyqtar sabaqtastyǵynyń jaı-japsaryn búgingi syn-qaterler aıasynda túsindiredi. Atqan tańdaı aqıqat sol - tarıh qashanda jas urpaq úshin qajet» deıdi halyq qalaýlysy.
Onyń aıtýynsha, Prezıdent máseleni jańa qyrynan qoıyp otyr.
«Ulttyq múddemizge saı keletin kóptomdyq jańa tarıhymyz áli tolyq jazylǵan joq. Onyń tujyrymdamasyn buǵan deıingi olqylyqtardy eskere otyryp qaıta qarap, jańa ǵylymı ustanymdar men jańalyqtardyń negizinde tyńnan jazatyn ýaqyt áldeqashan keldi» delingen maqalada. Bul - sabaqtastyq joly. Esterińizde bolsa, Elbasy Nursultan Nazarbaev naqty tarıhı málimet beretin oqýlyq túzý týraly tıisti qurylymdarǵa tapsyrǵan bolatyn. Barlyq másele bilikti mamandarǵa kelip tireledi. Áıtse de Elbasy ózi bastama kóterip, «Bolashaqqa baǵdar: rýhanı jańǵyrý», «Uly dalanyń jeti qyry» atty tujyrymdamalyq tarıhı maqalalar jazdy. Qasym-Jomart Toqaevtyń «Táýelsizdik bárinen qymbat» maqalasy - Táýelsizdiktiń 30 jyldyǵynyń qulaq kúıi. Úlken tarıhty baǵalaýdyń jańa platformasy. Jańashyl kontseptsııa. Ótken kún, qazirgi shaq, bolashaq arasyn jalǵaıtyn rýhanı tanym arqaýy. Qazir Otan tarıhyna jaýapty ǵylymı mekemeler, tıisti mınıstrlik, ýnıversıtetterdegi kafedralar men ǵylymı-zertteý ortalyqtar bar. Qanshama ýaqyt ishinde memlekettik mańyzy bar tapsyrmanyń oryndalmaýy - uıymdastyrý jumysyndaǵy kemshiliktiń kórinisi. Nemese jaýapty tulǵalardyń tikeleı qyzmettik mindetterin oryndaýǵa qabiletsizdigi. Bul - aşy syn, biraq halyq syny!» deıdi Darhan Myńbaı.
Depýtattyń sózine sensek, endi máseleni tez baǵamdap, túbegeıli sharalardy iske asyratyn naqty merzimderdi belgileý - Táýelsizdiktiń talaby.
«Árıne, bul iske eń bilikti otandyq tarıhshylar men basqa da gýmanıtarlyq ǵylym ókilderin tartý - mańyzdy is. Sarapshylardyń deńgeıi men tájirıbesi, talaby men talǵamy joǵary bolýǵa tıis. Túptep kelgende, bul - tarıhymyzdyń aldyndaǵy, memleketimizdiń aldyndaǵy jaýapkershilik. Kezek kúttirmes mindet. Bul jańa býyn, jas talaptar úshin aýadaı qajet. Óıtkeni, otandy súıý memlekettik tildi meńgerýden, tarıhty bilýden bastalady» dep túıindedi sózin Májilis depýtaty.
