Darhan Myńbaı: Іshki ister mınıstrligi Qordaıdaǵy oqıǵadan qorytyndy shyǵarýy kerek
«Menińshe, bul oqıǵanyń baǵasy Prezıdent aıtqandaı «negizgi sebep anyqtalǵannan keıin» beriledi. Bul jerde biz halyqtyń jeke sanatynyń tarapynan quqyqtyq nıgılızmdi ári Qordaı ishki ister bólimindegi polıtsııa qyzmetkerleriniń álsiz daıyndyǵyn kórip otyrmyz. Eger olar kásibı túrde áreket etkende oqıǵanyń saldary munshama aýyr bolmas edi. Olar quqyqbuzýshynyń baǵynbaı, kórsetken qarsylyǵynyń jolyn keser edi. Meniń oıymsha, Іshki ister mınıstrligi tıisti qorytyndy shyǵarýy kerek», - dedi Darhan Myńbaı.
Eske sala keteıik, keshe Jambyl oblysy Qordaı aýdanyndaǵy Masanchı aýylynyń turǵyndary arasynda jappaı tóbeles boldy. Kóp ótpeı Prezıdent Qasym-Jomart Toqaev Jambyl oblysy Qordaı aýdanynda bolǵan jappaı tóbeleske qatysty pikir bildirgen-di.
«Jambyl oblysy Qordaı aýdanynda buzaqylyq sıpattaǵy jappaı tóbeles boldy. Ony arandatýshylar óz paıdasyna qoldanbaq bolǵan. Polıtsııa jaǵdaıdy rettep, óz baqylaýyna aldy. Qoǵamdyq tártipti buzǵandar jaýapkershilikke tartylady» dep jazdy Qasym-Jomart Toqaev Twitter paraqshasynda.
Al búgin Memleket basshysy Jambyl oblysyndaǵy oqıǵaǵa baılanysty málimdeme jasady.
