Darhan Qydyráli ustazdar arasynda Egemen Qazaqstan-nyń bedeli artqanyn aıtty
ASTANA. QazAqparat - Ustazdar arasynda «Egemen Qazaqstan» gazetiniń bedeli artty. Bul týraly búgin Ortalyq kommýnıkatsııalar qyzmetindegi baspasóz máslıhatynda atalǵan basylymnyń basqarma tóraǵasy Darhan Qydyráli aıtty, dep habarlaıdy QazAqparat tilshisi.
Onyń aıtýynsha, búgingi kúni «Egemen Qazaqstan» oqyrmandarynyń negizgi bóligin jastar qurap otyr. ıAǵnı, arnaıy júrgizilgen saýalnama barysynda gazetti 18 ben 34 jas aralyǵyndaǵy adamdardyń oqıtyny anyqtalǵan.
«Qazir gazet qyzmetkerleriniń de jasy jasardy. Máselen, 2 jyl buryn ortasha jas 57 bolsa, qazir 30 jasty quraıdy. Sol sııaqty bizdiń oqyrmandarymyzdyń jasy da 18 ben 34-tiń arasynda. Bul gazettiń jastarǵa neǵurlym qyzyq bolyp kele jatqanyn kórsetedi», - dedi ol.
Gazet basshysy sońǵy ýaqytta Qazaqstan oqyrmandary arasynda oryn alyp otyrǵan trendke de toqtaldy.
«Bul qazaq aýdıtorııasynyń keńeıgeni desek bolady. Qazir qazaq tildi basylymdar, sonyń ishinde «Egemen Qazaqstannyń» taralymy artyp keledi. Jalpy gazetterdiń taralymynda belgili bir deńgeıde tómendeý baıqalsa, «Egemen Qazaqstannyń» taralymy ulǵaıdy. Máselen, byltyrǵy jylmen salystyrǵanda bıyl 20 myńǵa kóbeıdik. Bul ákimshilik resýrssyz, eshqandaı kúshteýsiz oryn aldy. Biz kúshtep jazdyrýǵa qarsymyz. Byltyr da málimdeme jasadyq. Taralymymyz artyp keledi. Óıtkeni, strategııamen jumys istedik. Birinshiden, jastarmen jumys jasadyq. Ekinshiden, bilim salasy - bizdiń negizgi oqyrmandarymyz. Sondyqtan UBT-ǵa daıyndyq suraqtaryn júrgizdik. Muǵalimderge qosymsha better arnadyq. Sol arqyly ustazdar qaýymy arasynda Egemenniń bedeli artty», - dedi Darhan Qydyráli.
