Darhan Qydyráli: Shet elderde mádenı jaýharlarymyzdy jahanǵa tanytatyn ortalyqtar ashylsa

ASTANA. QazAqparat -  Mádenı jaýharlarymyzdy jahanǵa  tanytý úshin shet elderde arnaıy ortalyqtar ashylsa. QR Prezıdenti Nursultan Nazarbaevtyń tóraǵalyǵymen ótken Dúnıejúzi qazaqtarynyń V quryltaıynda «Egemen Qazaqstan» RG» AQ basqarmasynyń tóraǵasy Darhan Qydyráli osyndaı usynys  jasady, dep habarlaıdy QazAqparat.

Ol QR Prezıdentiniń el gazeti Egemende jaryq kórgen «Bolashaqqa baǵdar: rýhanı jańǵyrý» atty maqalasy el ishinde de, shetelde de úlken serpilis týǵyzǵanyn basa atap ótti.

«Ultymyzdyń rýhyn asqaqtatyp, sanasyn serpiltken bul baǵdarlama búgingimizdi bútindep, bolashaǵymyzdy bekemdeýdiń berik qazyǵyna aınaldy. Barshaǵa baǵdar bolǵan baılamdy bátýaǵa qazaq balasy túgel atsalysýǵa tıis dep oılaımyz. Osy oraıda mádenı jaýharlarymyzdy jahanǵa júıeli tanytý maqsatynda shet elderde, ásirese dıaspora shoǵyrlanǵan elderde arnaıy ortalyqtar ashylsa degen tilegimiz bar. Sol arqyly ózińiz aıtqandaı qazaq tili de qulashyn keńge jazyp, tuǵyryn bıiktete túsedi dep  oılaımyz», - dedi Darhan Qydyráli.

 Onyń aıtýynsha, kıeli Atameken uǵymy bizdiń sanamyzda aıshyqtalady. Týǵan jer qanymyzdyń túıirshiginde, janymyzdyń túpkirinde, tarıhı tanym túısigimizdiń tereń qatparynda qattalady.

«Osydan quralǵan Otan degen qasıetti sóz urpaqtyń boıtumaryna aınalady. Kıeli jer biz úshin áýeli qutty qonys bolǵan jer, áýlıe-ámbe qonǵan jer, baba beıiti qalǵan jer. Bul turǵydan alǵanda altyndy Altaı da, jer jannaty Jıdeli-Baısynda, Edil men Jaıyq ta  barsha qazaq úshin kıeli meken, quttyq qonys. Bir zamanda qazaqtyń qatysýynsyz shekara syzǵanda arǵy bette qalyp qoıǵan aǵaıynnyń birazy búginde óz ata qonysynda otyr. Sondyqtan ol jerler de qazaq úshin kıeli bolyp sanalady», - dedi «Egemen Qazaqstan» gazetiniń basshysy.