Darhan Qydyráli Mońǵolııanyń «Temirqazyq» ordenimen marapattaldy

NUR-SULTAN. QazAqparat - Búgin Halyqaralyq Túrki akademııasyna Mońǵolııa Syrtqy qatynastar mınıstri Batmónhıın Battsetseg bastaǵan delegatsııa arnaıy kelip, Akademııa jumysymen tanysty, dep habarlaıdy QazAqparat akademııanyń resmı saıtyna silteme jasap.

Alqaly kezdesýge Mońǵolııa Syrtqy qatynastar mınıstri Batmónhıın Battsetseg, Mońǵolııanyń Qazaqstan Respýblıkasyndaǵy Tótenshe jáne ókiletti elshisi Lývsangıın Battýlga, Mońǵolııa Syrtqy qatynastar mınıstrliginiń Azııa, Tynyq muhıt elderi departamenti dırektory Erdenetsogtyn Sarantogos, Mońǵolııa Parlamentiniń depýtattary Tómórtoogoogıın Enhtúvshın jáne Tileýhan Áýbákir qatysty.

Jıyn barysynda Túrki akademııasy shyǵarǵan birqatar kitaptardyń tanystyrylymy ótti.

Mońǵolııa Syrtqy qatynastar mınıstri Batmónhıın Battsetseg tamyrlas elderdiń ortaq qundylyqtaryn zerttep, halyqtardyń baýyrlastyǵyn bekemdeýde Akademııanyń eńbegin joǵary baǵalaıtynyn jetkizdi.

Sonymen qatar, Akademııa basshysy Darhan Qydyrálige Mońǵolııa Prezıdentiniń Jarlyǵymen berilgen Mońǵolııa memleketiniń joǵarǵy marapaty ‒ «Temirqazyq» ordenin tapsyrdy.