Darhan Qydyráli: Qazaqstannyń ár óńirinde asharshylyqqa arnalǵan eskertkish bolsa artyq etpeıdi

ASTANA.  QazAqparat - Qazaqstannyń ár óńirinde asharshylyqqa arnalǵan eskertkish bolsa artyq etpeıdi. Búgin Sarap Time sarapshylar klýbynyń «Tarıhı sana jáne qoǵamnyń rýhanı qaýipsizdigi» taqyrybyndaǵy otyrysynda Halyqaralyq Túrki akademııasynyń prezıdenti Darhan Qydyráli osyndaı pikir bildirdi, dep habarlaıdy QazAqparat.

«Bilýimshe, Almatyda asharshylyqqa eskertkish ornatylmaq eken. Osy Arqada da, qazaqtyń qaı jerinde de asharshylyqqa, zulmat jyldarǵa eskertkish  bolsa artyq bolmas edi dep oılaımyz. Eki balasy bolsa bir balasyn pisirip jegen oqıǵalar ol bizdiń  tarıhymyzdaǵy úlken alapatty kezeń», - dedi Darhan Qydyráli.

Sonymen qatar ol kúshtep ujymdastyrý, mejeleý saıasaty da qazaq halqynyń kóp qıyndyqtar týyndatqanyn basa atap ótti.

«Aǵaıyn aǵaıynnan qol úzip qaldy. Bizdiń qazirgi Ortalyq Azııadaǵy birshama problema bolsa, ol sol mejeleý saıasatynyń kesiri. Bir ǵana Jetisýda birge otyrǵan halyq úsh memlekettiń  quramynda qalyp qoıdy. Ózbekstan, Qyrǵyzstan jáne Qazaqstan bolyp bólinip qaldy», - dedi ol.

Munan bólek, Halyqaralyq Túrki akademııasynyń prezıdenti saıası qýǵyn-súrgin zardaptaryna da toqtaldy.

«Álhamdýılla 6 mln halyqpyz dep  jazǵan Alash zııalylarynyń eshqaısysy odan tys qala alǵan joq. Halyq úshten ekisinen aıyrylyp  qaldy  degen statıstıka qazir  kóbirek aıtylýda. Biraq, eń bastysy halyq tek qana óziniń adam sany emes shyn máninde  ulttyq jadydan aıyryldy», - dedi ol.