Darhan Qydyráli: Alash áskeriniń qurylǵan kúni - merekege aınalýy kerek

ASTANA. QazAqparat - Túrki akademııasy halyqaralyq uıymynyń (TWESCO) prezıdenti, «Egemen Qazaqstan» respýblıkalyq gazeti» AQ basqarma tóraǵasy Darhan Qydyráli Alash áskeriniń qurylǵan kúnin merekege aınaldyrý kerektigin atap ótti, dep habarlaıdy «QazAqparat» HAA tilshisi.

«Bizdiń tarıhymyzdaǵy aqtańdaq betteri kóp. Berik Ábdiǵalıdiń kitaby (Voısko Alash - Alash áskeri) - sonyń ornyn toltyratyn, olja salǵan súbeli eńbek boldy dep esepteımiz. Bul týyndynyń bizdiń oqýlyqtarymyzǵa jańalyq retinde ener tustary kóp», - deıdi Darhan Qydyráli Astanadaǵy Ulttyq akademııalyq kitaphanada ótken «Alash áskeri: tarıhtan taǵylym» taqyrybyndaǵy dáriste.

Túrki akademııasynyń prezıdenti jıynda halyq qalaýlylary men generaldar otyrǵandyqtan, elimizdegi áskerı oqý oryndarynda «Alash áskeri» kitaby oqytyla bastaıtynyna úmittenip otyrǵanyn jetkizdi.

«Túrkııanyń osy jerge birneshe ókili kelip otyr. Túrkııa óziniń Qarýly kúshteriniń tarıhyna «Túrkııa Respýblıkasynyń Qarýly Kúshteriniń qurylǵany - bizdiń dáýirimizden burynǵy 120 jyldary, ıaǵnı Móde qaǵannyń kezi» dep jazyp qoıǵan. Demek, Túrkııanyń Qarýly kúshteri óziniń negizin 2000 jyldan buryn bastaıdy. Biz keıde ózimizdi burynǵy ádetpen 23 aqpanda quttyqtap jatamyz. Alash áskeriniń qurylǵan kúni bizdiń aramyzda bir merekege aınalýy kerek degen bir oıymyz bar», - deıdi ol.

Darhan Qydyráli sonymen qatar, jalpy, Alashtaný - Alashtyń 100 jyldyǵymen shektelmeıtinin tilge tıek etti.

«Alashtaný Táýelsizdikpen birge bastaldy. Otandyq tarıhymyzdyń ol taqyryptaǵy zertteýleri 100 jyldyq aıasynda jańa beleske kóterildi. Sondyqtan, bir jarqyn kórinisi - osy kitap», - deıdi ol.