Darhan Qydyráli: Ultymyzdyń tarıhı-rýhanı jáne kıeli oryndaryn saqtaý qajet
ASTANA. KAZINFORM — Qazaqstanda ulttyń rýhanı baǵdaryna aınalǵan jáne halyqqa qorǵan bolǵan kóptegen kıeli oryndar bar. Úkimet basshysyna depýtattyq saýal joldaǵan senator Darhan Qydyráli osy baǵyttaǵy jumystardy kúsheıtý qajettigin aıtty.
«Keshenderdiń kóbi joıylǵan, endi biri bastapqy kelbetinen qatty aýytqyǵan, tarıhı oryndardy qalaýynsha ózgertken. Sol sııaqty sansyz babtar mekeni Saıramda qasterli oryndar qaraýsyz jatyr. VIII-IX ǵasyrdan qalǵan kóne qorymnyń bir shetin bazar basyp barady. Baǵzy Isfıdjabtan jetken Ibrahım ata, Qarashash ana, Qyzyr haziret sııaqty tarıhı-rýhanı nysandardy saqtaý qajet. Sondyqtan kóne Saıram men Sozaqtaǵy rýhanı eskertkishterdi saqtaý isin Túrkistandaǵy «Áziret Sultan» qoryq-murajaıyna tapsyrýdy usynamyz», - dedi senator.
Darhan Qydyráli elimizdegi rýhanı eskertkishterdi qorǵaýǵa erekshe nazar aýdarý qajettigin atap ótti jáne olar bizdiń muramyz ben tarıhymyz ekenin atap ótti.
«Ulttyń ımmýnıtetin qalyptastyratyn rýhanı oryndar taǵylym mektebi bolýy kerek. Ǵasyrlar boıy qalyptasqan rýhanı qalqanymyz – dińgekti dástúr men rýhanı bulaq kózderi zerdelene bastasa, destrýktıvti teris aǵymdardyń jolyn jabýǵa septesedi. Tarıhı keshenderdi ulttyq brend retinde ıÝNESKO-ǵa usyný isin júıelep, jedeldetý qajet. Memleket basshysy 2019 jyly elimizdi rýhanı-etnografııalyq týrızmniń ortalyǵyna aınaldyrýdy tapsyrǵany belgili. Sondyqtan kıeli mekenderdi memleket qaraýyna alý, zańdy qataıtý, ınfraqurylymdy damytý qajet dep oılaımyn», - dedi depýtat.
