Darhan Qydyráli Senat depýtaty retinde ant berdi

Búgin Senattyń jalpy otyrysynda Darhan Qydyráli depýtat retinde ant berdi, dep habarlaıdy QazAqparat tilshisi.

«Qazaqstan halqyna adal qyzmet etýge, Qazaqstannyń tutastyǵy men táýelsizdigin nyǵaıtýǵa, onyń Konstıtýtsııasy men zańdaryna qatań baǵynýǵa, depýtattyń ózime júktelgen mártebeli mindetterin adal atqarýǵa ant etemin», – dedi D. Qydyráli.

Sonymen qatar, otyrys baarysynda Darhan Qydyráli Senattyń Halyqaralyq qatynastar, qorǵanys jáne qaýipsizdik komıteti quramyna saılandy

Budan buryn habarlanǵandaı, osy aptada D. Qydyráli Parlament Senatynyń depýtaty bolyp taǵaıyndaldy.

Osy qyzmetke deıin 2022 jyldyń qyrkúıeginen bastap Qazaqstan Respýblıkasy Aqparat jáne qoǵamdyq damý mınıstri boldy.

D.Qydyráli 1974 jyly 16 sáýirde Túrkistan oblysy Túlkibas aýdanynda dúnıege kelgen.

Ál-Farabı atyndaǵy QazUÝ-da (1991-1992 j) jáne Túrkııanyń Marmara (1992-1996 j), Dokýz Eılúl (1996-1997), Egeı (1997-1998 j), Ystanbul (1998-2001 j) ýnıversıtetterinde bilim alǵan. Egeı ýnıversıtetinde dıssertatsııa qorǵaǵan (1998). Ystanbul ýnıversıtetinde doktorlyq dıssertatsııa qorǵap, «fılosofııa doktory» ǵylymı dárejesin ıelengen (2001 j.). Abaı atyndaǵy QazUPÝ-da doktorlyq dıssertatsııa qorǵap, tarıh ǵylymdarynyń doktory atanǵan (2010 j).

2001-2005 jyldary – Q.A.ıAsaýı atyndaǵy Halyqaralyq qazaq-túrik ýnıversıtetinde aǵa ǵylymı qyzmetker, ǵalym-hatshy, kafedra meńgerýshisi, apparat jetekshisi, jetekshi ǵylymı qyzmetker.

2005-2006 jyldary – L.N.Gýmılev atyndaǵy Eýrazııa ulttyq ýnıversıtetinde dotsent, aǵa ǵylymı qyzmetker.

2006-2007 jyldary – QR Prezıdenttik mádenıet ortalyǵynda dırektordyń orynbasary.

2007-2008 jyldary – QR Bilim jáne ǵylym mınıstrliginde mınıstrdiń keńesshisi.

2008-2009 jyldary QR Prezıdenti Ákimshiliginde sarapshy, sektor meńgerýshisi retinde qyzmet atqarǵan.

2009-2012 jyldar arasynda QR Prezıdenti Baspasóz hatshysynyń orynbasary bolǵan.

2012 -2014 jyldary Túrki keńesi Bas hatshysynyń orynbasary bolyp qyzmet atqardy.

2014 jyldan bastap Halyqaralyq Túrki akademııasynyń prezıdenti.

2015 jylǵy 29 maýsymnan Túrki álemi Ulttyq ǵylym akademııalar odaǵy hatshylyǵynyń basshysy qyzmetin qosa atqarady jáne atalǵan odaqtyń uıymdastyrýshysy.

2016 jyldyń shildesinen «Egemen Qazaqstan» respýblıkalyq gazeti» aktsıonerlik qoǵamynyń Basqarma tóraǵasy.

2018 jyldyń qyrkúıeginde Halyqaralyq Túrki akademııasy prezıdenti laýazymynyń ekinshi merzimin atqardy.