Darhan Káletaev jastardy «bolashaqtyń» mamandyqtaryn ıgerýge shaqyrdy
ASTANA. QazAqparat - Búgin Shymkent qalasynda QR Din isteri jáne azamattyq qoǵam mınıstri Darhan Káletaev óńirdegi stýdentter jáne belsendi jastarmen kezdesý ótkizdi, dep habarlaıdy QazAqparat mınıstrliktiń baspasóz qyzmetine silteme jasap.
Mınıstr D.Káletaev óz sózinde adamnyń negizgi ómirlik qajettiligine aınalatyn joǵary bilim alýdyń mańyzdylyǵyn atap ótti.
Onyń pikirinshe, talapkerler oqý ornyn jáne mamandyǵyn tańdaý kezinde joǵary bilim ordasynyń mártebesine jáne tegin bilim alý múmkindigi sııaqty mańyzdy ólshemderge kóp nazar aýdara bermeıdi.
Mınıstr buǵan dálel retinde jastardyń qalaıtyn mamandyqtaryna júrgizilgen áleýmettik zertteýlerdiń derekterin keltirdi. Tańdaýly mamandyqtar arasynda zańger (13%), medıtsına (10,5%), ekonomıka (7,7%), dızaın (6,5%), qarjy (5,9%), kólik (5,3%) sekildi mamandyqtar atap ótiledi. «Bolashaqtyń mamandyqtary», onyń ishinde aqparattyq tehnologııalar (4,4%) basymdyqqa ıe mamandyq qataryna enbeıdi.
«Bul pragmatızmniń joqtyǵyn bildiredi. Bilimdi tegin alýǵa múmkindik bola tura, sizderge quny qymbat jáne eńbek naryǵynda talap etilmeıtin bilim úshin aqsha tólep, ata-analaryńyzdy qaryzǵa batyrýdyń qajeti nede?» - dep surady mınıstr Darhan Káletaev kezdesýge jınalǵan jastardan.
Mınıstr ótken oqý jylynan bastap Memleket basshysynyń bastamasy boıynsha «Barshaǵa ortaq tegin tehnıkalyq jáne kásiptik bilim» baǵdarlamasy bastalǵanyn eske salyp ótti. Sondaı-aq, 2017-2021 jyldarǵa arnalǵan Nátıjeli jumyspen qamtýdy jáne jappaı kásipkerlikti damytý baǵdarlamasynyń sheńberinde jumyssyzdardy qaıta daıarlaý úshin jaqsy jaǵdaılar jasalǵan. Budan bólek, aǵymdaǵy jyldyń naýryz aıynda Memleket basshysy óziniń «Bes áleýmettik bastama» úndeýinde memlekettik qoldaý sharalaryn jarııalaǵany belgili.
«Jastar saıasaty salasynda qatysy bar jastardyń eshqaısysy nazardan tys qalmaıdy. Qarapaıym otbasylardan shyqqan Qazaqstanda tabysqa jetken birneshe jastardy mysal retinde aıta alamyn», - dedi Darhan Káletaev.
Esterińizge sala keteıik, búgin Shymkent qalasynda Qazaqstan Respýblıkasynyń Prezıdenti janyndaǵy Jastar saıasaty jónindegi keńesiniń HHІ otyrysy ótti. Sharada «Rýhanı jańǵyrý» baǵdarlamasy aıasynda qazirgi qazaqstandyq jastardyń qundylyq maqsattary men jastar arasyndaǵy mádenı-bos ýaqyt qyzmetterin tımidi uıymdastyrý máseleleri talqylandy.
