Darhan Qaletaev QR velosport federatsııasynyń prezıdenti bolyp saılandy
ASTANA. QazAqparat - Búgin Astanada Qazaqstan velosport federatsııasynyń eseptik-saılaý máslıhaty ótti, onyń barysynda federatsııa prezıdenti Qaırat Kelimbetovtiń ókildigi alynyp tastalyp, qoǵamdyq uıymnyń jańa basshylary saılandy.
«Qazaqstan velosport federatsııasynyń prezıdenti qyzmetine Darhan Qaletaev kelse, birinshi vıtse-prezıdent bolyp Raıymbek Batalov, vıtse-prezıdentter bolyp Aleksandr Vınokýrov, Zúlfııa Zabırova jáne Amanbek Qulshyqov saılandy», - delingen federatsııanyń baspasóz paraqshasynda.
Eske sala keteıik, QR velosporty federatsııasynyń burynǵy prezıdenti Qaırat Kelimbetov bul qyzmetten 2015 jyldyń qańtarynda ketetini jaıly málimdep, oǵan sebep retinde óziniń negizgi jumysyndaǵy jumysbastylyǵyn aıtty. Qaırat Kelimbetov QR Ulttyq bankiniń tóraǵasy bolyp tabylady.
