Darhan Káletaev ımamdarmen birlese atqaratyn jumystyń alty baǵytyn atady
Sapar aıasynda mınıstr aldymen oblys ortalyǵynan 220 shaqyrym qashyqtyqta ornalasqan Temir aýdanyna qarasty Keńqııaq, Shubarshı aýyldaryna baryp, jergilikti turǵyndarmen kezdesti. Onda Darhan Káletaev dinı saladaǵy memlekettik saıasattyń basymdyqtaryn túsindirip, halyqpen pikir almasty.
Kezdesý barysynda mınıstr din salasyndaǵy zańnamada bet-álpetti jabýǵa tyıym salýdyń ne sebepti engizilip otyrǵanyn aıtty.
«Bet-álpetti jabý - qazaq halqyna jat. Bul tarıhymyzda da, mádenıetimizde de bolmaǵan. Sondyqtan áıelderdiń bet-álpetin jabýyn zańdy túrde tyıym salyp otyrmyz. Bul turǵyda qoǵamda durys pikir bar, kópshiligi qoldap otyr», - dedi D. Káletaev.
Sonymen qatar Din isteri jáne azamattyq qoǵam mınıstri mektepte oramal taǵý máselesine oraı óz pikirin bildirip, mekteptiń talabyn ustaný qajettigin basa aıtty.
Darhan Káletaevtyń aıtýynsha, osyndaı talappen qatar, onyń alternatıvti joly da bar. Onyń biri - qashyqtyqtan oqytý tehnologııalaryn paıdalana otyryp úıde oqytý. Mınıstr bul másele boıynsha Bilim jáne ǵylym mınıstrimen pikirlesip jatqanyn jáne bul baǵytta jumystar jalǵasyp jatqanyn atady.
Aqtóbe óńirine sapar barysynda mınıstr Temir aýdanynyń ortalyǵynda aýdan aktıvimen jáne ardagerlermen, teolog-ımamdarmen, sonymen qatar aýdandyq terrorızmge qarsy komıssııa múshelerimen kezdesti.
Tústen keıin Din isteri jáne azamattyq qoǵam mınıstri Alǵa aýdanyndaǵy Bestamaq aýylynda bolyp, Aqtóbe oblysyndaǵy Qazaqstan musylmandary dinı basqarmasynyń ımamdarymen kezdesti.
Mınıstr óz sózinde «Dinı qyzmet jáne dinı birlestikter týraly» Zańǵa tolyqtyrýlar engizý qajettiligin ýaqyttyń ózi kórsetip otyrǵanyn aıtty.
«Keıbir toptardyń osy zańnama jobasyn «ıslam dininiń múddelerine qaıshy keledi, musylmandarǵa qarsy baǵyttalǵan» degen jalǵan málimet taratyp júrgenin de jasyrýǵa bolmaıdy. Bul málimetter múlde negizsiz», - dep málidedi D. Káletaev.
Osy rette, mınıstr ımamdardy zańnama jobasyna barynsha qoldaý bildirip, atalǵan zań jobasynyń paıdasyn, artyqshylyqtaryn halyqqa tolyqtaı túsindirýge atsalysýǵa shaqyrdy.
Darhan Káletaev din salasynda ımamdarmen birlese atqaratyn jumystyń negizgi alty baǵytyna toqtalyp ótti. Olar: teris dinı aǵymdardyń qyzmetine tosqaýyl qoıý; destrýktıvti dinı aǵymdarmen jumys júrgizetin ımamdar men teologtardyń bilimi men biligin kóterý; dinı ekstremızm men radıkalızm ıdeıalary taralýynyń aldyn alýǵa qatysty aqparattyq-túsindirý jumystaryna turǵyndardy keńinen qamtý; jastardyń boıynda radıkaldyq ıdeıalarǵa qarsy nóldik ımmýnıtetti qalyptastyrý; meshit ımamdarynyń ýaǵyzyn «Ýaǵyz aıtýdyń biryńǵaı tártibinde» bekitilgen qaǵıdat boıynsha júzege asyrý; «Meshitterdiń ishki tártip erejesin» jetildirý.
Darhan Káletaev destrýktıvti dinı aǵymdarmen jumys júrgizetin ımamdar men teologtardyń bilimi men biligin kóterýde Dinı basqarmanyń Aqtóbe oblysyndaǵy ýákildigine jergilikti ımamdar men teologtardyń rezervin qalyptastyrýdy usyndy.Qalyptasqan rezerv boıynsha «Nur-Múbarak» ýnıversıtetine biliktilikti kóterýge ımamdar men teologtar jiberilip otyratyn bolady.
QR Din isteri jáne azamattyq qoǵam mınıstri Darhan Káletaev Aqtóbe oblysyna jumys sapary aıasynda Temir aýdanynyń ortalyǵyndaǵy «Dosjan ıshan» meshitiniń jáne Alǵa aýdanyndaǵy «Aqtóbe medrese» kolledjiniń jumysymen tanysty.
