Darhan Káletaev Almatydan Qytaıǵa deıingi jańa velotýr týraly aıtty

Búgin Almatyda «Almaty týry 2018» ekikúndik velojarysy aıaqtaldy. Jeńimpazdardy marapattaý rásimine qatysqan QR Velosport federatsııasynyń prezıdenti Darhan Káletaev týrdyń nátıjesi men aldaǵy josparlar týraly aıtty.

«Almaty týry» osymen altynshy ret ótip otyr. Aıtarlyqtaı tájirıbe jınaldy. «Almaty týry» álem kúntizbesinde óziniń laıyqty ornyn alyp úlgerdi. Bizdi Halyqaralyq velosıpedshiler odaǵy belsendi qoldap keledi. Búgingi doda - Ortalyq Azııadaǵy eń iri jarystardyń biri. Bıylǵy ózgeris - marshrýtty almatylyqtardyń mádenı ári tarıhı oryndary bar basty dańǵyldardyń boıyna qurdyq. Telekartına arqyly ońtústik astanamyzdyń sulýlyǵyn búkil álemge pash ettik. Jarysqa alty jyl kóp sekildi kórinýi de múmkin, biraq bul tek bastaýy. Taǵy bir josparymyzdy aıta otyraıyn. Qytaı velosport federatsııasymen kelissóz júrgizip jatyrmyz. «Almaty týry» men «Qytaı týryn» biriktireý múmkindigin kóp ýaqyttan beri talqylap kelemiz», - dep keltiredi Darhan Káletaevtiń sózderin federatsııa. 

Onyń aıtýynsha, Almaty-Qytaı kópkúndik jarysyn «Jibek joly týry» dep atap kózdelýde.

«Ózindik bir «Jibek joly týryn» jasaǵymyz keledi. Sóresi Almatyda, al máresi Qytaıdyń belgili bir qalasynda bolsa - bul álemdik velosport masshtabyndaǵy óte iri sport oqıǵasy bolar edi. Ózderińiz de bilesizder, qazirgi eń iri grand-týrlar Eýropada ótedi - «Týr de Frans», «Výelta» jáne «Djıro d'Italııa». Azııa óz jerinde tórtinshi iri kópkúndik evant ótkizýge laıyq bolǵan shyǵar. Bizdiń maqsat - úlken Azııa týryn ótkizý, «Almaty týry» - onyń bastaýy», - dedi ol.

Buǵan deıin habarlaǵanymyzdaı, «Almaty týry 2018» velojarysyna ár elden kelgen 19 komanda qatysty. Eki kezeńnen ótken dodanyń alǵashqy kúni «Astana Pro Team» komandasynyń múshesi Davıde Vıllela jeńiske jetse, búgin atalmysh komandanyń taǵy bir ókili Lýıs Leon Sanches úzdik atandy.