Darhan Bazarbaevtyń erligi – bizdiń bárimiz úshin úlgi - mınıstr

NUR-SULTAN. QazAqparat – Aqparat jáne qoǵamdyq damý mınıstri Dáýren Abaev qyzmettik mindetin atqarý kezinde qaskóıdiń qolynan mert bolǵan Darhan Bazarbaevtyń týǵan-týystaryna kóńil aıtyp, polıtseıdiń erligi – búkil elge úlgi ekenin atap ótti, dep habarlaıdy QazAqparat.

«Myńdaǵan qazaqstandyqty, sonyń ishinde meni de Qostanaı oblysynda qyzmettik mindetin atqarý kezinde kóz jumǵan Darhan Bazarbaevtyń erligi beı-jaı qaldyrǵan joq. Jas polıtseı otbasyn janjal shyǵarýshydan qutqaryp, óz ómirin qurban etti. Men kóz jumǵan polıtsııa qyzmetkeriniń týǵan-týystaryna kóńil bildire otyryp, elsúıer laıyqty ul ósirgeni úshin alǵysymdy aıtqym keledi. Ol antyna adal bolyp, qyzmettik mindetin oryndaý barysynda jan tapsyrdy. Mundaı erlik – bizdiń bárimiz úshin úlgi. Biz polıtsııa qyzmetkerlerin jıi synaımyz. Biraq, bir sátke olardyń jumysy qanshalyqty kúrdeli ári qaýipti ekenin oılasaq eken. Qoǵamdyq tártipti saqtaý úshin olar qyzmet etedi. Bizdiń kóshelerdegi búgingi tynyshtyq úshin biz solarǵa alǵys aıtýymyz kerek», - dedi mınıstr «Ashyq dıalog» baǵdarlamasynda.

Eske salaıyq, Darhan Bazarbaev 19 qańtar kúni qyzmettik mindetin atqarý kezinde qaskóıdiń qolynan mert boldy.

Qyzmetin atqarý kezinde mert bolǵan qostanaılyq polıtseıdiń artynda 4 aılyq sábıi qaldy.

Prezıdent Qasym-Jomart Toqaevtyń Jarlyǵymen qyzmettik boryshyn atqarý ústinde kóz jumǵan polıtseı Darhan Bazarbaev ІІІ dárejeli «Aıbyn» ordenimen nagradtaldy.