Darhan Asadilov Japonııadaǵy Premer-lıga kezeńiniń fınalyna shyqty
NUR-SULTAN. QazAqparat - Búgin Tokıoda karateden kezekti Premer-lıga bastaldy, dep habarlaıdy QazAqparat olympic.kz-ke silteme jasap.
Jarystyń birinshi kúninde erler 60, 67 jáne 75 kelige deıingi salmaqta baq synasa, qyzdar 50, 55 kelige deıingi salmaq dárejesinde ózara myqtyny anyqtaıdy. Erlerden 60 kelige deıingi salmaqta synǵa túsken Darhan Asadilov jarysty jeńispen bastady. Álemdik reıtıng kóshbasshysy birinshi aınalymda ıspanııalyq sportshy Ortız Fernandesti, keıin Stefan Vıktordy jeńdi. Jartylaı fınaldyq joldamany sarapqa salarda Darhan brazılııalyq qarsylasy Rafael Nasımentodan aılasyn asyrdy. Tartysty báseke 10:0 esebimen qazaqstandyq sportshynyń enshisine sheshildi. Al jartylaı fınalda álem reıtınginde 11-shi orynda turǵan Iran sportshysy, óziniń burynǵy qarsylasy Hasan Madjıdpen kezdesip, kezdesýdi 6:0 esebimen aıaqtady. Premer-lıganyń fınalynda Darhan Asadilov álem reıtınginde 2-orynda turǵan Álem chempıony ıtalııalyq Andjelo Krechenzomen kezdesedi.
Sondaı-aq, jastar arasyndaǵy álem chempıony Erkinbek Baıtóreev birnshi aınalymda óte tájirıbeli sportshymen kúsh synasty. Azııa oıyndarynyń júldegeri, BAO sportshysy Abdalla Alharbıdi jeńse, ekinshi aınalymda rýmynııalyqty ońaı utty. Odan keıingi qarsylasy reseılik Evgenıı Plahýtınnen 2:0 esebimen basym tústi. Alaıda Erkinbek jartylaı fınalda túrkııalyq Samadana Eraıǵa jol berip, jarysty toqtatty. Fınaldyq kezdesýler 8 qyrkúıekke josparlanǵan.