Dárigerge qol kótergender neshe jylǵa qamalady

ASTANA. KAZINFORM – Bul saýalǵa Densaýlyq saqtaý mınıstri Aqmaral Álnazarova jaýap berdi.

- Memleket basshysy jańa normany ázirleý júktedi, biz norma jobasyn ázirledik. Búginde Bas prokýratýramen, Іshki ister mınıstrligimen birlesip jumys istep jatyrmyz, aldyn ala oń qorytyndy alyndy. Qylmystyq kodekske medıtsına qyzmetkerlerine kúsh kórsetý, qol jumsaýǵa qatysty jeke bap engiziledi. Bul Qylmystyq kodektiń jańa 158-baptyń 1-tarmaǵy bolady, ol bostandyqty shekteý nemese aıyrý jazasyn qarastyrady, - dedi Aqmaral Álnazarova Úkimet úıinde ótken baspasóz máslıhatynda.

Mınıstrdiń málimdeýinshe, eger medıtsınalyq qyzmetkerge kúsh qoldaný qaýpi tónse jáne fakti tirkelgen jaǵdaıda 2 jylǵa deıin bostandyǵyn shekteý jazasy kózdelip otyr.

- Al eger bir medıtsına qyzmetkerine qatysty kúsh qoldanǵan jaǵdaıda 2 jyldan 7 jylǵa deıin bas bostandyǵynan aıyrý, tótenshe jaǵdaı kezinde jasalǵan bolsa 10 jylǵa deıin, al eger bul áreket birneshe medıtsına qyzmetkerine, ıaǵnı bir top mamanǵa qarsy bir nemese birneshe adam tarapynan jasalsa 15 jylǵa deıin bas bostandyǵynan aıyrý jazasy qarastyrylady, - deıdi vedomstvo basshysy.

Keshe Memleket basshysy Qasym-Jomart Toqaev medıtsına qyzmetkerlerine kúsh kórsetkeni úshin jazany kúsheıtýdi tapsyrdy. 

Sondaı-aq Densaýlyq saqtaý mınıstri Aqmaral Álnazarova Qostanaı jáne Qaraǵandy qalalarynda dárigerlerge qatysty sumdyq oqıǵalardan keıin qazaqstandyqtarǵa úndeý joldady.