Dárigerlerdiń qateligi úshin aqy tólenedi: jańa zań kúshine endi

 ASTANA. KAZINFORM – Elimizde medıtsına qyzmetkerleriniń kásiptik jaýapkershiligin saqtandyrý týraly zań kúshine endi. Bul týraly Qarjy naryǵyn retteý jáne damytý agenttigi habarlaıdy.

Jańa zańǵa sáıkes densaýlyq saqtaý sýbektileri (medıtsınalyq uıymdar jáne jeke medıtsınalyq praktıkamen aınalysatyn jeke tulǵalar) medıtsına qyzmetkerleriniń kásiptik jaýapkershiligin saqtandyrýǵa jáne biryńǵaı saqtandyrý pýlymen saqtandyrý shartyn jasasýǵa mindetti. Saqtandyrý sharty Medpul.kz elektrondyq aqparattyq júıe arqyly júzege asyrylady.

Biryńǵaı saqtandyrý pýly 2024 jylǵy 2 qazanda quryldy jáne olar birlesip jasaǵan qyzmet týraly shart negizinde jumys isteıdi. Pýldyń quramyna kásiptik jaýapkershilikti saqtandyrý synyby boıynsha ýákiletti organnyń lıtsenzııasy bar 14 saqtandyrý uıymy kirdi.

Pýldyń qyzmetin basqarý úshin saqtandyrý brokeriniń qyzmetin júzege asyrý quqyǵyna ýákiletti organnyń lıtsenzııasy bar «MOI» saqtandyrý brokeri» JShS tartyldy.

Biryńǵaı saqtandyrý pýlynyń qatysýshylary úshin pýl qabyldaǵan mindettemeler boıynsha jaýapkershilik ortaq. Biryńǵaı saqtandyrý pýly densaýlyq saqtaý sýbektisimen birlesip saqtandyrý shartyn jasasýdan bas tarta almaıdy jáne pýl qatysýshysynyń ortaq mindetterdi oryndaýdan bas tartýǵa quqyǵy joq.

Saqtandyrý tólemderi dárigerlerdiń baıqaýsyzda jasaǵan kásibı qatelikterinen zardap shekken patsıentke tólenedi. Ómiri men densaýlyǵyna zııan keltirý faktisin rastaý jáne saqtandyrý tólemin alý úshin patsıentke nemese onyń jaqyn týystaryna (zańdy ókilderine) densaýlyq saqtaý mekemesine júginý qajet.

Medıtsınalyq qyzmetti júzege asyrý nátıjesinde patsıenttiń ómiri men densaýlyǵyna zııan keltirý faktisiniń bolýy (bolmaýy) týraly sheshimdi táýelsiz saraptama komıssııasy qabyldaıdy. Komıssııa quramynda sarapshylar, kásibı medıtsınalyq qaýymdastyqtardyń jáne biryńǵaı saqtandyrý pýlyna qatysýshy saqtandyrý uıymynyń ókilderi retinde tartylatyn beıindi mamandar bar. Zardap shekken patsıent, medıtsınalyq qyzmetter alǵan densaýlyq saqtaý sýbektisiniń ókilderi táýelsiz saraptama komıssııasynyń quramyna engizilmeıdi.

Patsıent táýelsiz saraptama komıssııasy qorytyndysynyń nátıjelerimen kelispegen jaǵdaıda Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıtetine nemese sotqa júginýge quqyly.

Medıtsınalyq qyzmetti júzege asyrý nátıjesinde patsıenttiń ómiri men densaýlyǵyna zııan keltirý faktisi oryn alǵany jóninde komıssııanyń sheshimi saqtandyrý tólemin júzege asyrý úshin biryńǵaı saqtandyrý pýlyna jiberiledi.

Zańmen saqtandyrý tólemderiniń eń az somalary belgilengen, olar patsıentke úshinshi, ekinshi jáne birinshi toptaǵy múgedektik belgilengen jaǵdaıda - 500, 600, 800 AEK quraıdy, tıisinshe múgedektigi bar bala –500 AEK, ólimge ákelgen zııan keltirilgeni úshin – 3 000 AEK, múgedektik belgilenbeı patsıenttiń ómiri men densaýlyǵyna keltirilgen zııan úshin – 300 AEK-ten aspaıtyn saqtandyrý tólemderi tólenetin bolady.

Sondaı-aq, zańmen osy densaýlyq saqtaý sýbektisi tólegen saqtandyrý syılyqaqysy somasynyń 5%-ynan aspaıtyn mólsherde saqtandyrylǵan medıtsına qyzmetkerlerine advokattardyń qyzmetterine aqy tóleýge arnalǵan shyǵystardy óteý somasy belgilengen.