Dárigerlerdi qorǵaý: Qylmystyq kodekske jańa bap engizildi

ASTANA. KAZINFORM — Dárigerlerdi qorǵaýǵa arnalǵan jańa normalar usynyldy. Bul týraly Májilistiń jalpy otyrysynda dárigerler men jedel járdem qyzmetkerlerin qorǵaýǵa arnalǵan zań jobasyn talqylaý kezinde depýtat Ashat Aımaǵambetov málim etti.

— Memleket basshysy Qasym-Jomart Kemeluly Toqaev mundaı áreketter úshin jazany qatańdatýdy birneshe ret tapsyrdy. Osy zań — Prezıdent tapsyrmasynyń tikeleı oryndalýy, al dárigerlerdi qorǵaý degenimiz — ol «Zań men Tártip» prıntsıpiniń mańyzdy bóligi. «AMANAT» partııasy óz baǵdarlamasynda medıtsına qyzmetkeriniń mártebesin kóterýge ýáde bergen bolatyn. Sondyqtań bul normalar bizdiń saılaýshylar aldyndaǵy ýádemizdiń oryndalýy. Qylmystyq kodekske jańa 380-3-babyn engizemiz. Ol «medıtsına qyzmetkeri» jáne «jedel medıtsınalyq járdem júrgizýshisi» degen arnaıy sýbektini belgileıdi, — dedi A. Aımaǵambetov.

Osy oraıda depýtat Qylmystyq kodekste dál osylaı, erekshe mártebemen qorǵalatyn birqatar mamandyq bar ekenin eske saldy. Olardyń qatarynda polıtseıler, qutqarýshylar, arnaıy qyzmet jáne quqyq qorǵaý organdarynyń qyzmetkerleri (380-1-bap), sýdıalar men sot qyzmetkerleri, prokýrorlar, ákimder, depýtattar, salyq ınspektorlary taǵy basqa (380-bap) bılik ókilderi bar.

— Al endi kelesi qoldanystaǵy normaǵa erekshe nazar aýdarsaq — bul qoryqshylar men janýarlar ınspektorlaryn qorǵaýǵa arnalǵan jeke bap (380-2-bap). Eger qoryqshynyń densaýlyǵyna zaqym keltirse, qylmysker arnaıy bap boıynsha qazirgi ýaqytta qatań jazalanady — ol 12 jylǵa deıin bas bostandyǵynan aıyrylady. Iá, bul ádiletti sheshim. Al eger adamnyń ómirin arashalap jatqan reanımatolog-dárigerdi soqqyǵa jyqsa, bul jaı ǵana daladaǵy buzaqylyq sııaqty jalpy negizde tergeledi. Bul ádiletti me? Búginde jaýapkershilik tym jeńil. Buzaqy kishigirim aıppulyn tólep, jaıbaraqat júre beredi. Sondyqtan dárigerlerdi qorǵaý úshin usynǵan arnaıy baptyń dıspozıtsııasyn, sanktsııalaryn jáne qurylymyn egerlerdi qorǵaıtyn baptaǵydaı qylyp, tipti sózbe-sóz berdik, — dedi depýtat.

Bul turǵyda Májilis depýtattary adamdardyń ómirin qutqaratyn aq halatty jandarǵa da dál qoryqshylarǵa berilgendeı qorǵaý men jaýapkershilik tetikterin engizýdi usyndy. 

Eske salsaq, bıyl jazda Qostanaıda dárigerdi soqqyǵa jyqqan buzaqy eki aıǵa qamaýǵa alyndy. 

Sonymen qatar, maýsym aıynda Qaraǵandy oblysynda er adam eki dárigerdi soqqyǵa jyqqany málim boldy.