Dárigerlerdi qoldaý tetikteri qandaı nátıje berdi

Keıingi jyldary atqarylǵan jumystar dárigerlerge degen qajettilikti 20,4%-ǵa tómendetýge múmkindik berdi. 2025 jyldyń qorytyndysy boıynsha dárigerler tapshylyǵy 3 869,5 shtattyq oryndy qurady. Máselen, 2024 jyly - 3 986, 2023 jyly 4 863 dáreger tapshylyǵy bolǵan.

- Bul rette aýyldyq jerlerdegi dárigerler tapshylyǵy 28,3%-ǵa tómendedi. 2025 jyly aýyldarda 803,5, 2024 jyly – 932, sondaı-aq 2023 jyly 1 121 maman jetispegen edi, - dep jazylǵan vedomstvo derekterinde.

Sonymen qatar, medıtsınalyq kadrlardyń syrtqa ketý jaǵdaıy jyl saıyn tómendep keledi. Bul rette 2023 jyly 429 maman basqa elge bet túzese, 2025 jyly bul kórsetkish 186-ǵa deıin tómendedi.

- 2023 – 2025 jyldar kezeńinde praktıkalyq densaýlyq saqtaýdyń qajettilikterine sáıkes, 6205 jas maman jumysqa ornalastyryldy, onyń ishinde 1 232 maman aýyldyq medıtsınalyq uıymdarda eńbek qyzmetin bastady (2023 jyly – 322 adam, 2024 jyly – 370 adam, 2025 jyly – 540 adam). Aldaǵy jospar kadr tapshylyǵyn qysqartýǵa, mamandardy nysanaly daıarlaýǵa, medıtsına qyzmetkerlerin ustap qalý jónindegi sharalardyń tıimdiligin arttyrýǵa, onyń ishinde kásibı beıimdeý men tálimgerlikti damytýǵa baǵyttalady, - deıdi vedomstvo ókilderi.

Dárigerlerdi qoldaý tetikteri

- Qazirgi ýaqytta densaýlyq saqtaý júıesiniń negizgi máseleleriniń biri - medıtsınalyq kadrlardyń tapshylyǵy. Osyǵan baılanysty sońǵy jyldary medıtsına qyzmetkeriniń mártebesin arttyrý maqsatynda Úkimet tarapynan birqatar pármendi zańnamalyq sharalar qabyldanyp, medıtsına qyzmetkerlerin quqyqtyq jáne qarjylyq qorǵaý júıesi jetildirildi. Sońǵy úsh jylda áleýmettik qoldaý sharalarymen 2 556 medıtsına qyzmetkeri qamtyldy (2023 jyly – 263, 2024 jyly – 796, 2025 jyly – 1 760). 2025 jyly keminde bes jyl merzimge aýyldyq jerge jumys isteýge kelgen asa tapshy mamandyqtardyń medıtsına qyzmetkerlerine eń tómen jalaqynyń (ETJ) 100 mólsherinde birjolǵy aqshalaı tólemdi 529 maman aldy (2024 jyly – 254 maman), - delingen mınıstrliktiń Kazinform agenttigine bergen jaýabynda.

Budan bólek, respýblıkalyq jáne jergilikti bıýdjet qarajaty esebinen 100 aılyq eseptik kórsetkishke deıin (AEK) mólsherinde kóterme birjolǵy tólemder júzege asyryldy. Aýdan ortalyqtaryna kelgen mamandarǵa turǵyn úı satyp alýǵa nemese salýǵa 2 500 AEK-ke deıin, basqa aýyldyq eldi mekenderge kelgen mamandarǵa 2 000 AEK-ke deıin bıýdjettik nesıe berildi. Medıtsına qyzmetkerleriniń balalary úshin mektepke deıingi uıymdardan oryndar berilip, kólik shyǵyndary óteldi. Sonymen qatar, áskerı qyzmetti medıtsınalyq mamandyq boıynsha ótkerý nemese áskerı qyzmetke shaqyrýdan keıinge qaldyrý múmkindigi berildi. Munymen qosa, medıtsına qyzmetkerleriniń kásiptik jaýapkershiligin saqtandyrý densaýlyq saqtaý uıymdarynyń qarajaty esebinen júzege asyrylady.

- Densaýlyq saqtaý júıesiniń strategııalyq mindetteriniń biri - óńirlik medıtsınalyq uıymdar bazasynda kásibı beıimdeý jáne tálimgerlik ortalyqtarynyń jumys isteýin qamtamasyz etý. Ortalyqtar jas mamandardy beıimdeý, tálimgerlik etý, kásibı quzyretterin jetildirý jáne psıhologııalyq qoldaý kórsetý arqyly keshendi qoldaý men kásibı damýdy qamtamasyz etedi. Qazirgi kezeńdegi negizgi mindet - tek tartylǵan mamandardyń sanyn arttyrý ǵana emes, sonymen qatar olardy naqty aýmaqtarda, ásirese medıtsınalyq kadrlardyń asa tapshylyǵy bar aýdandar men aýyldarda turaqty bekitý, - dep atalyp ótken komıtet aqparatynda.

Jyl saıyn «Qazaqstannyń eńbek sińirgen dárigeri» qurmetti ataǵy beriledi jáne 1 000 AEK mólsherinde birjolǵy tólem júzege asyrylady (2024 jyly – 3 dárigerge, 2025 jyly – 9 dárigerge). Respýblıkalyq «Óz kásibiniń úzdigi» konkýrsynyń jeńimpazdaryna 500 AEK mólsherinde birjolǵy tólem beriledi (2024 jyly – 16 jeńimpaz, 2025 jyly – 17 jeńimpaz, 2026 jyly – 17 jeńimpaz).

Qazirgi kezde medıtsına salasynda 280 000-nan astam maman qyzmet etip jatyr.

Aıta keteıik, buǵan deıin áskerı medıtsınanyń ardageri «Qazaqstannyń eńbek sińirgen dárigeri» ataǵyn alǵanyn jazǵan edik.