Dárigerler júreginde týa bitken aqaýy bar úsh jastaǵy balany aman alyp qaldy
ASTANA. KAZINFORM – Ulttyq ǵylymı medıtsınalyq ortalyqta sırek kezdesetin týa bitken júrek aqaýy – úlken tamyrlardyń túzetilgen transpozıtsııasy (KTGA) bar 2022 jyly týylǵan naýqasqa joǵary tehnologııalyq operatsııa jasaldy.
Densaýlyq saqtaý mınıstrligi málimetinshe, bul –kúrdeli anomalııa, onda atrıoventrıkýlıarlyq qosylys ınverttelgen: oń jaq atrıým morfologııalyq sol jaq qarynshaǵa, sol jaq atrıýmǵa – morfologııalyq oń jaq qarynshaǵa qosylady.
Transpozıtsııanyń eki deńgeıiniń bolýyna qaramastan, qan aǵymy fızıologııalyq turǵydan durys bolyp qalady. Venozdyq qan ókpege, arterııalyq qan júıeli aınalymǵa baǵyttalǵan. Degenmen júıeli júktemeni morfologııalyq oń jaq qarynsha kóteredi, ol ádette tómen qysym jaǵdaıynda jumys isteýge arnalǵan. Bul onyń progressıvti sıstolalyq dısfýnktsııasyna jáne júrek jetkiliksizdiginiń damýyna ákelýi múmkin. Birinshi kezeń 9 aılyǵynda ókpe arterııasyn baılaý operatsııasy boldy. Bul mıokardty aldaǵy júıeli júktemege daıyndaýǵa múmkindik berdi.
2025 jyldyń 13 maýsymynda kardıohırýrgııalyq top túbegeıli túzetýdi – qos kameraly kardıostımýlıatordy bir ýaqytta ımplantatsııalaý arqyly Double Switch operatsııasyn jasady. Operatsııa eki negizgi kezeńdi qamtydy: qan aǵymynyń anatomııalyq durys baǵytyn qalpyna keltirýge múmkindik beretin Sennıng operatsııasy (júrekshe deńgeıinde venozdyq baǵytty ózgertý) jáne Djaten operatsııasy (negizgi tamyrlar deńgeıinde arterııalyq baǵytty ózgertý). Operatsııa shamamen alty saǵatqa sozyldy, onyń ishinde qolqany qysý ýaqyty eki saǵatqa sozyldy.
Interventsııaǵa daıyndyq kóp satyly boldy. Ortalyq mamandary klınıkalyq kóriniske egjeı-tegjeıli taldaý jasap, jetekshi sheteldik professorlarmen keńes uıymdastyrdy. Muny balalar kardıohırýrgııalyq ortalyǵynyń dırektory Kerimqulov Amangeldi Qýanyshbekuly erekshe atap ótip, búkil ujymnyń uıymshyldyǵy men kásibı sheberligi joǵary ekenin atap ótti.
Hırýrgııalyq brıgada quramyna balalar kardıohırýrgııasy bóliminiń meńgerýshisi, kardıohırýrg Baqytjan Abdýllauly, balalar kardıohırýrgııasy bóliminiń aǵa ordınatory Baýyrjan Myrzabaıuly, balalar kardıohırýrgi Erbol Nurlanuly, anestezıologııa, reanımatsııa jáne balalar kardıohırýrgııasy bóliminiń terapııa bólimshesiniń meńgerýshisi Ásel Hanatqyzy jetekshilik etetin anestezıolog-reanımatologtar brıgadasy, emdeýshi dáriger, balalar kardıology Araılym Orynbekqyzy, sondaı-aq ortalyqtyń medbıkeleri kirdi.
Búginde naýqas 3 jasta. Alda saýyqtyrý kýrsy, operatsııadan keıingi baqylaý jáne ońaltý. Dál dıagnostıkanyń, komandalyq jumystyń jáne zamanaýı hırýrgııalyq múmkindikterdiń arqasynda bala tolyqqandy ómir súre alady.
Aıta keteıik, jyl basynan beri 79 qazaqstandyq búıregin almastyrǵan.