Dárigerler júregi 4 ret toqtap qalǵan, jańa bosanǵan anany aman alyp qaldy
QONAEV. KAZINFORM – Almaty oblysynyń dárigerleri tórt ret júregi toqtap qalǵan, jańa bosanǵan anany aman alyp qaldy.
Almaty kópsalaly klınıkalyq aýrýhanasy baspasóz qyzmetiniń málimetinshe, áıel júktiliktiń 36 aptasynda beli men ishtiń tómengi jaǵynyń qatty aýyrsyný shaǵymen túsken. Dárigerler shuǵyl kesar tiligi otasyn jasap, áıel salmaǵy 3390 gramm qyzdy dúnıege ákeldi. Otadan keıin segizinshi kúni jańa bosanǵan ana balasymen qanaǵattanarlyq jaǵdaıda aýrýhanadan shyǵaryldy. Bir aptadan keıin jas ana esinen tanyp, aýdandyq aýrýhanaǵa qaıta tústi.
«Dárigerler naýqas turyp jatqan Raıymbek aýdanynyń Narynqol aýylyna shuǵyl jetti. Qysqa ýaqyt ishinde naýqastyń júregi tórt ret toqtap qaldy. Júrgizilgen reanımatsııalyq is-sharalardyń nátıjesinde jergilikti reanımatolog pen Almaty kópsalaly klınıkalyq aýrýhanasynyń mamandary patsıenttiń júrek — qantamyr qyzmetin qalpyna keltirdi», — deıdi AKKA kardıolog dárigeri Aıgúl Tursaǵatova.
Naýqastyń júrek qyzmeti qalpyna keltirilgennen keıin Respýblıka kóleminde beıindi shtattan tys mamandarynyń qatysýymen telemedıtsınalyq konsılıým uıymdastyryldy.
«Naýqasta qabyný protsesi tez damyp, aǵzadaǵy kóptegen múshelerdiń asqynýy baıqalyp, sonyń saldarynan búırek jetkiliksizdigi paıda boldy. Naýqas birden prismaflex gomeostazdy ekstrakorporaldy túzetý apparatyna qosyldy. Bul septıkalyq shoktyń aýyr jaǵdaıynda búırektiń zaqymdanýy bar naýqastarmen jumys isteýge arnalǵan arnaıy qurylǵy. Bul apparat bizge 72 saǵat boıy terapevtik plazmalyq almasýdy jáne búırekti almastyrý terapııasyn uzartýǵa múmkindik berdi, onyń ishinde: metabolızm ónimderin joıý, suıyqtyqty shyǵarý, qyshqyl-negiz balansyn baqylaý jáne elektrolıt balansyn qalpyna keltirý jumystary júrgizildi», — deıdi nefrolog dáriger Maıra Qaǵazbaeva.
Mamandar aýdandyq aýrýhanada tórt táýlik boıy medıtsınalyq kómek kórsetip, vazopressorlardyń dozalaryn azaıtyp, jeldetkishte sanıtarlyq avıatsııa jelisi boıynsha 5-táýlikte gemodınamıkany turaqtandyrý úrdisi anyqtalǵannan keıin naýqas AKKA reanımatsııasyna aýystyryldy.
«Bizdiń mamandardyń úılesimdi toptyq jumysy men kásibıliginiń arqasynda qazirgi ýaqytta naýqas ózin jaqsy sezinip, jalpy palataǵa aýystyryldy jáne hattamaǵa sáıkes em qabyldap jatyr. Mundaı jaǵdaılarda, ádette, ólim-jitim óte joǵary bolady. Biz naýqasty qutqaryp qalǵanymyzǵa qýanyshtymyz jáne ol kóp uzamaı aýyr zardaptarsyz balalaryna oralady», — dep bólisti AKKA dırektory Elmıra Berikova.
