Dárigerler sý juta almaı qalǵan búldirshinniń óńeshindegi jylankózdi emdep jazdy
Tamyz aıynda pedıatrııa jáne balalar hırýrgııasy ǵylymı ortalyǵyna Taldyqorǵannan sý ishkende únemi shashalyp, jótelip, jıi pnevmonııaǵa shaldyǵa beretin 4 jasar qyz bala kelip tústi, dep habarlaıdy QazAqparat tilshisi.
Pedıatrııa jáne balalar hırýrgııasy ǵylymı ortalyǵy dárigerleriniń aıtýynsha, keńirdek óńesh jylankózi — keńirdek pen óńesh tútiginiń arasyndaǵy tesiktiń bitispeýi saldarynan paıda bolatyn týabitken aqaý.
Ol embrıogenezdiń 4-6 aptasynda bastapqy ishek pen tynys alý tútiginiń tolyq bólinbegeninen qalyptasady.
Keńirdek pen óńesh arasyndaǵy týabitken jylankóz 3000 jańa týǵan náresteniń bireýinde kezdesedi. Oqshaýlanǵan fıstýlalar óńeshtiń búkil damý anomalııasynyń 3-4% quraıdy.
Qosarlanǵan patologııalardyń aýyr túrleriniń biri — keńirdek-óńesh jylankózi.
Taldyqorǵandyq tórt jasar Elenanyń anasy bala týǵannan pnevmonııamen jıi aýyratynyn atap ótti.
«Biz ylǵı pnevmonııamen aýyryp, emdeletinbiz. Antıbakterıaldy terapııadan keıin pnevmonııa biraz ýaqytqa deıin jazylǵandaı bolady. Sosyn qaıta bastalady. Sý, sháı sııaqty suıyqtyqty ishkende shashalý osy kúnge deıin qalyp qoıdy», — deıdi Elenanyń anasy ıÝlııa Jýravleva.
Kishkentaı qyzdan keńirdek óńesh jylankózi (fıstýla) osy jyly KT túsirý kezinde anyqtalǵan.
Pedıatrııa ortalyǵy dárigerlerimen telemedıtsına arqyly keńes júrgizilgennen keıin bala jedel túrde pedıatrııa ortalyǵyna jiberildi.
Pedıatrııa jáne balalar hırýrgııasy ǵylymı ortalyǵyna túskennen keıin kishkentaı patsıentke keshendi zertteý júrgizildi: óńeshti rentgendik kontrastty zertteý, vıdeoezofagogastroskopııa, fıbrobronhoskopııa.
Zertteý qorytyndysy boıynsha sırek kezdesetin týabitken keńirdek-óńesh jylankózi dıagnozy qoıyldy.
Operatsııa aldyndaǵy daıyndyqtan keıin moıyn medıastenotomııa, keńirdek óńesh fıstýlasyn alyp tastaıtyn ota jasaldy. Operatsııa bir saǵattan asa ýaqytqa sozyldy.
«Bul — pedıatrııada sırek kezdesetin erekshe jaǵdaı. Bizdiń tájirıbede alǵash ret kezdesip otyr. Ádette bizde qosarlanǵan óńesh stenozy men óńesh atrezııasy jıi kezdesedi. Oqshaýlanǵan keńirdek óńesh jylankózi — sırek kezdesetin týabitken aqaý. Qarapaıym tilmen aıtqanda, traheıa men óńesh arasyndaǵy tesikke baılanysty tamaq únemi ókpege túsedi. Sonyń saldarynan pnevmonııa jáne qabyný bolady. Birneshe klınıkada júrgizilgen rentgen sáýlesi onyń bar ekenin kórsetpegen. 4 jasqa deıin balada bul patologııa anyqtalǵan joq. Operatsııa sátti jasalyp, qazir kishkentaı patsıentimiz úıine shyǵýǵa daıyndalyp jatyr. Qazirgi ýaqytta bala sý ishkende shashalmaıdy. Kóńil kúıi jaqsy. Aman-esen. Tigisi de jazyldy», — deıdi operatsııa jasaǵan dárigeri Konstantın Haırov.
