Slovakııa premer-mınıstrine ne úshin qastandyq jasaldy
ASTANA. KAZINFORM – Slovakııanyń premer-mınıstri Robert Fıtsoǵa jasalǵan shabýyl el halqy men bıligin qatty kúızeltti. Dárigerler úkimet basshysynyń ómiri úshin kúresip jatyr, dep habarlaıdy Euronews.
Slovakııa premer-mınıstri Robert Fıtsoǵa qastandyq jasaýdyń mán-jaıyn anyqtaǵan alǵashqy tergeý qylmystyń saıası sebepterin kórsetedi. Bul týraly eldiń Іshki ister mınıstrliginiń basshysy Matýsh Shýtaı-Eshtok málimdedi.
Slovakııanyń qorǵanys mınıstri Robert Kalınıaktiń habarlaýynsha, dárigerler úkimet basshysynyń ómiri úshin kúresip jatyr. Bul málimdeme jasalǵan kezde dárigerler oǵan ota jasap jatqan.
«Premer-mınıstr Robert Fıtso osynda, Banska-Bıstrıtsadaǵy aýrýhanada emdelip jatyr. Eldiń Qorǵanys mınıstri men Іshki ister mınıstrligi basshylarynyń qatysýymen ótken baspasóz máslıhaty jaqynda ǵana aıaqtaldy. Premer-mınıstrge jasalǵan shabýyl eldi jáne Fıtso úkimetiniń mınıstrlerin qatty kúızeltkeni anyq. Bul oqıǵa Slovakııadaǵy tereń saıası qaıshylyqtardy kórsetti», - dep habarlaıdy Euronews tilshisi Gabor Tanach.
Naýqan kezinde Robert Fıtsonyń SMER partııasy demokratııaǵa nuqsan keltirdi dep aıyptaldy. Fıtso men onyń partııasy oppozıtsııany Batysqa «eldi satty» dep aıyptady. Qorǵanys mınıstri Robert Kalınıaktiń málimdeýinshe, premer-mınıstrge jasalǵan qastandyq eldiń azamattyq soǵystyń aldynda turǵanyn kórsetti.
Prezıdent Zýzana Chapýtova Slovakııada jek kórýshilikti toqtatý kerek ekenin aıtty.
R.Fıtsoǵa shabýyl 15 mamyrda tústen keıin jasaldy. Oqıǵa Gandlovadaǵy úkimettiń kóshpeli otyrysyna keıin boldy. Fıtso oq jaraqatyn alyp, aýrýhanaǵa jetkizildi. Kúdikti oqıǵa ornynda ustaldy.
