Dárigerler Şýchede órtten zardap shekken tórt adamnyń jaǵdaıy týraly baıandady
ASTANA. KAZINFORM — Aqmola oblystyq aýrýhanasynyń jansaqtaý bólimshesi Şýchedegi «Palaý ortalyǵy» dámhanasyndaǵy jarylystan zardap shekkenderge medıtsınalyq kómek kórsetýdi jalǵastyryp otyr, dep habarlaıdy Kazinform tilshisi.
Qazirgi ýaqytta tórt naýqas anestezıologııa, reanımatsııa jáne qarqyndy terapııa bólimshelerinde táýlik boıy em qabyldap jatyr. Olardyń úsheýiniń jaǵdaıy aýyr, turaqty. Bir naýqastyń denesiniń 85%-yn kúıik shaldy jáne kúıik beti aýmaǵynyń úlken bolýyna baılanysty jaǵdaıy aýyr.
— Ol ókpeni jasandy jeldetý apparatyna qosylǵan. Barlyq zardap shekkender medıtsınalyq kómekti tolyq kólemde alyp jatyr, kún saıyn shtattan tys aǵa mamandarmen konsýltatsııalar ótkizilip otyr. Mamandar efferentti terapııa ádisterin engizdi. Astanadaǵy Jedel medıtsınalyq kómek ortalyǵyna kúndelikti esep jiberilip jatyr. Jaǵdaı Aqmola oblysy ákimdigi men Qazaqstan Densaýlyq saqtaý mınıstrliginiń baqylaýynda, — dep baıandady Aqmola oblystyq kópsalaly aýrýhanasy.
Oblystyq densaýlyq saqtaý basqarmasynyń málimetinshe, «Avıtsenna Býrabaı» aýrýhanasynda em alyp jatqan qalǵan tórt aýyr haldegi naýqastyń jaǵdaıy ózgerissiz qalyp otyr.
Eske sala keteıik, Býrabaı aýdanynyń Şýche qalasynda turǵyn úıge japsarlas salynǵan bir qabatty kafede gaz-aýa qospasynyń jarylysy bolyp, artynsha órt shyqty.
Keıinnen Şýchedegi jarylysqa baılanysty qylmystyq is qozǵaldy.
Şýchedegi jarylysta qaza tapqandardyń otbasyna 2 mln teńgeden beriletini habarlandy.
Şýche qalasyndaǵy oqıǵany tergeıtin komıssııa quryldy.
Qaza tapqandardyń asyraýynda eńbekke qabiletsiz otbasy músheleri bolǵan jaǵdaıda, olardyń otbasylaryna respýblıkalyq bıýdjetten asyraýshysynan aıyrylý jaǵdaıy boıynsha memlekettik áleýmettik járdemaqy taǵaıyndalatyny belgili boldy.
Býrabaıdaǵy órtten zardap shekken bes adam Astanaǵa jetkizildi.
Aqmola oblysynyń dárigerleri áleýmettik jelilerde taralǵan Şýchedegi «Palaý ortalyǵy» kafesinde bolǵan órtten zardap shekkenderge shuǵyl qan qajet degen aqparatty joqqa shyǵardy.