Dárigerler, ınjenerler, zańgerler – Prezıdent Іs basqarmasyna qandaı mamandar qajet
ASTANA. KAZINFORM – QR Prezıdenti Іs basqarmasynda joǵary jáne orta oqý oryndarynyń 300-ge jýyq stýdenti óndiristik tájirıbeden ótti, olardyń 101-in jumyspen qamtý josparlanyp otyr.
Búgin QR PІB stýdentterdi óndiristik tájirıbege shaqyrý jáne jumyspen qamtý boıynsha dóńgelek ústel ótkizdi.
«Bizdiń is-sharanyń maqsaty – stýdentterdiń óndiristik jáne dıplom aldyndaǵy praktıkasyn jáne túlekterdiń Prezıdent Іs basqarmasy júıesiniń kásiporyndaryna jumysqa ornalasýyn uıymdastyrýdaǵy yntymaqtastyqtyń negizgi baǵyttaryn anyqtaý. Búgin biz sarapshylar men bilim berý mekemeleriniń ókilderin pikir almasýǵa jáne úzdik tájirıbelermen bólisýge shaqyrdyq. Búgingi dıalog PІB vedomstvolyq baǵynysty uıymdarynyń oqý oryndarymen ózara is-qımyly protsesterin jaqsartatynyna, jańa ıdeıalar men sheshimder ákeletinine, joǵary jáne orta oqý oryndarynyń túlekterin odan ári jumysqa ornalastyrýǵa járdemdesetinine senimdimin», - dedi QR Prezıdenti Іs basqarmasy apparatynyń basshysy Serik Kenjebaev.
Búgingi tańda PІB vedomstvolyq uıymdarynda medıtsına, sanatorıı-kýrorttyq saýyqtyrý, avıatsııa, ǵımaratty paıdalaný, qurylys, jýrnalıstıka, týrızm, orman sharýashylyǵy sııaqty salalarda kóptegen mamandarǵa qajettilik bar.
«Sondyqtan PІB júıesiniń fýnktsıonaldyq mindetteri óte keń, qajettilik týyndaǵan birneshe mamandyqty tizip óteıin: dárigerler, terapevtter, reabılıtologtar, epıdemıologtar, kardıohırýrgter, energetıka ınjenerleri, qaýipsizdik jáne eńbekti qorǵaý ınjenerleri, qurylys ınjenerleri, sýmen jabdyqtaý ınjenerleri, avtoelektrıkter, avtoslesarlar, avtomehanıkter, gaz- elektr dánekerleýshiler kerek. Sondaı-aq, ákimshilik-basqarý blogyna bizge saýatty aýdarmashylar, marketologtar, zańgerler qajet, qazir ınternet damyǵandyqtan SMM-menedjerleri, grafıkalyq dızaınerler qajet», - dedi S. Kenjebaev.
QR PІB uıymdary men joǵary jáne orta oqý oryndary arasynda jumys týraly memorandýmdar jasalǵan. Búgin de Lomonosov atyndaǵy Máskeý memlekettik ýnıversıtetiniń Qazaqstandaǵy fılıalymen yntymaqtastyq jónindegi memorandýmǵa qol qoıyldy.
QR PІB Medıtsına ortalyǵynyń Medıtsınalyq tehnologııalar jáne aqparattyq júıeler ortalyǵynyń prezıdenti Ashat Áshimov keshendi taldaý nátıjesinde ózekti mamandyqtar tizimi jasalǵanyn, bul oqý oryndarymen tıimdi yntymaqtastyq etýge jáne zamanaýı talaptarǵa saı mamandar ázirleýge múmkindik beretinin jetkizdi.
«Biz oqý oryndarymen yntymaqtastyq týraly 67 memorandým bekittik, onyń 48-i joǵarǵy oqý oryndarymen, 19-y – orta oqý oryndarymen jasalǵan. Bul kelisimder ári qaraıǵy yntymaqtastyqtyń negizi bolady jáne joǵary bilikti kadr daıarlaýǵa baǵyttalǵan birlesken bastamalardy júzege asyrýǵa kómektesedi. Nátıjesinde JOO men kolledjderdiń 299 stýdenti bizdiń vedomstvoǵa qarasty uıymdarda óndiristik praktıkadan ótti. Olardyń 101-i vedomstvoǵa qarasty uıymdarǵa jumysqa ornalasty. Qazir taǵy qosymsha 29 stýdent tájirıbe jınaqtap júr», - dedi A. Áshimov.
Atalǵan sharalarǵa qosymsha, QR PІB 27 bos jumys oryndary jármeńkesine qatysyp, bolashaq mamandarǵa mansaptyq keleshek týraly tolyqqandy aqparat bergen.
