Dárigerler áıeldiń qulaǵynda túlegen órmekshini shyǵaryp aldy
Otolarınolog dárigerler qyzmet jolynda naýqastardyń qulaǵynan bógde denelerdi, ondaǵan, tipti odan da kóp qurt-qumyrsqa men jándikterdi kezdestiredi. Kazinform bul týraly Sky News basylymyna silteme jasap habarlaıdy.
64 jastaǵy áıel birneshe tún boıy sol jaq qulaǵynda áldene jybyrlap júrgenin, tarsyldap jatqanyn sezgen. Uıqysyz túnderden keıin ol emhanaǵa barýdy sheshken.
Dárigerler tekserý kezinde áıeldiń qulaq kanalynda kishkentaı órmekshi qozǵalyp júrgenin baıqaǵan. Sondaı-aq olar órmekshiniń eski terisin, ıaǵnı eski ekzoskeletti kórgen.
Taıvandaǵy Taınan mýnıtsıpaldyq aýrýhanasynyń otolarınologııa bóliminiń meńgerýshisi, dáriger Tenchın Van órmekshi men onyń ekzoskeletin shyǵarý úshin dárigerler tútiksheni paıdalanǵanyn aıtty.
Ol órmekshi óte kishi, eki-úsh mıllımetrdeı ǵana bolǵandyqtan áıel aýrýdy sezbegenin atap ótti.
Adam qulaǵynda jándiktiń túleýi birinshi ret kezdesip tur. Bıyl sáýirde bolǵan bul oqıǵa Jańa Anglııa medıtsınalyq jýrnalynda jazylǵan (New England Journal of Medicine).
Doktor Van osyǵan uqsas belgiler baıqalsa medıtsınalyq kómekke júginýge shaqyrady.
Ońtústik Florıda shtatynyń ENT Sinus and Allergy klınıkasynyń dárigeri Devıd Kasl dáriger Van esebindegi jándik sýreti «erekshe ári dabyl qaǵatyndaı» bolǵanyn aıtty.
Onyń aıtýynsha, estý jolynda syrtqy estý joly dep atalatyn óte juqa ári sezimtal teri bóligi bar. Onyń sezimtaldyǵy sonsha, adam qulaqta jybyrlap, sýsyp júrgenniń bárin birden sezedi jáne oǵan uzaq shydaý múmkin emes.
Dáriger Van qulaqqa kirip ketken iri jándikter qozǵalyp, qulaqty zaqymdamas úshin lıdokaın nemese etanol paıdalanyp olardy óltirý qajet deıdi. Biraq qulaq perdesi tesilgen nemese zaqymdalǵan bolsa bul tásildi oryndaýǵa bolmaıdy.
