Dárigerler Atyraýda otadan keıin kóz jumǵan qyzdyń Astanaǵa nege jetkizilmegenin túsindirdi
ATYRAÝ. KAZINFORM — Atyraýda murnyna josparly ota jasalǵannan keıin jaǵdaıy kúrt nasharlaǵan 16 jastaǵy qyzdy sanavıatsııamen Astanaǵa jetkizýge onyń bas mıynyń isinýi múmkindik bermegen. Bul týraly Atyraý oblystyq balalar aýrýhanasynyń basshysy Almıra Sabyrǵalıeva túsindirdi.
Josparly ota shamamen 20 mınýtqa sozylyp, odan keıin naýqas oıatý palatasyna jatqyzylǵan. Aýrýhana basshysynyń sózinshe, otadan keıin qyzdyń murnyna qan toqtatý úshin tampon qoıylǵan. Ol narkozdan keıin esin jıyp, ózdiginen dem ala bastaǵan kezde tynys alý tútigi alynǵan.
— Medbıke sol jerde balanyń jaǵdaıynyń nasharlaǵanyn kórgen. Dáriger shaqyrǵan. Alǵashqy reanımatsııalyq kómek kórsetildi. Balanyń murnynan ketip qalǵan tampondy anyqtap, ony alýǵa ýaqyt kerek. Jalpy tynys jolyna árbir sekýnd qymbat. Sol kezde balanyń mıyna zaqym kelip tur, — dedi aýrýhana basshysy.
Tampon tynys alý jolyna túsip, ókpege barǵan. Sonyń saldarynan ókpe men mı arasyndaǵy ottegi almasýy buzylyp, keıin bas mıynyń isinýi paıda bolǵan. Dárigerlerdiń sózinshe, mundaı jaǵdaıda naýqasty qozǵaltýdyń ózi qaýipti.
— Naýqastyń jaǵdaıyna baılanysty, ıaǵnı bas mıynyń isinýi bolǵandyqtan balany ornynan qozǵaý bolmaıtyn jaǵdaı týyndady. Sebebi isik qozǵalǵan saıyn ulǵaıyp ketedi. Tikushaqpen joǵary qysymmen kóterilgen kezde qarama-qaıshylyq bolady, — dedi Almıra Sabyrǵalıeva.
Atyraý oblysynyń densaýlyq saqtaý basqarmasy buǵan deıin jasóspirimniń ólimine qatysty tekserý júrgizilip jatqanyn habarlaǵan.
Eske salaıyq, 16 jastaǵy qyzdyń murnyndaǵy artyq etti alý maqsatynda tamyz oıynyń ortasynda josparly ota jasalady. Alaıda naýqas 7 qyrkúıek kúni kóz jumǵan.
Qazir oqıǵanyń mán-jaıy, medıtsınalyq kómektiń der kezinde kórsetilgen-kórsetilmegeni jáne onyń sapasy, sondaı-aq týyndaǵan asqynýlardyń sebepteri jan-jaqty zerdelenip jatyr.
