Dárigerler 2 jasar sábıdiń asqazanynan 105 túıir magnıttik monshaqty aldy

ALMATY. KAZINFORM – Almatyda 2 jas 3 aılyq bala magnıt monshaqtaryn jutyp qoıǵan. Hırýrgter shuǵyl ota jasap bógde zatty alyp shyqty.

Qalalyq densaýlyq saqtaý basqarmasynyń málimetinshe, 20 aqpan kúni Balalar shuǵyl medıtsınalyq kómek kórsetý ortalyǵyna 2 jas 3 aılyq bala bógde zat jutýy múmkin degen kúdikpen jetkizildi.

Rentgenografııa jasaǵan kezde balanyń asqazanynda ólshemi 6,2×2,2 sm bolatyn kóptegen metall zattan quralǵan konglomerat anyqtaldy.

– Dárigerler bógde zatty endoskopııalyq ádispen alýǵa tyrysty. Alaıda magnıtterdiń tyǵyz jınalýynyń kesirinen bul múmkin bolmady. Osyǵan baılanysty hırýrgııalyq aralasý – laparotomııa jáne gastrotomııa jasaý týraly sheshim qabyldandy. Ota barysynda balanyń asqazanynan 105 magnıtti monshaq alyndy, - dep habarlady densaýlyq saqtaý basqarmasynan.

Operatsııadan keıin bala jansaqtaý bólimine jatqyzylyp, keıin palataǵa aýystyryldy. Qazir jaǵdaıy qanaǵattanarlyq.

Osyǵan deıin almatylyq dárigerler magnıt jutyp qoıǵan eki balany aman alyp qalǵan bolatyn. 

Sondaı-aq Aqmola oblystyq balalar aýrýhanasynyń hırýrgtary tórt jastaǵy balanyń ishinen 39 túıir magnıttik monshaqty alyp shyǵyp, búldirshinniń ómirin saqtap qaldy.