Dárigerge shabýyl jasaldy: densaýlyq saqtaý basqarmasy oqıǵanyń mán-jaıyn jarııalady

Vedomstvonyń málimetinshe, 31 qazan kúni saǵat 15:40-ta aýrýhanaǵa ishi aýyryp, álsizdikke shaǵymdanǵan bala jetkizilgen. Kezekshi hırýrg naýqasty qarap, jalpy qan taldaýyn jáne qursaq qýysynyń rentgenografııasyn taǵaıyndaǵan. Tekserý nátıjesinde shuǵyl hırýrgııalyq ota jasaýdy qajet etetin patologııa anyqtalmaǵan.

Dáriger ata-anasyna tekserý qorytyndysyn túsindirip, spazmolıtıkalyq preparat taǵaıyndaý qajettigin aıtqan sátte balanyń ákesi agressııa tanytqan. Densaýlyq saqtaý basqarmasynyń habarlaýynsha, er adam aldymen jumys ústelin teýip, keıin dárigerdiń jaǵasynan ustap, qylqyndyryp, qabyrǵaǵa ıterip, kúsh qoldanǵan.

Vedomstvo ókilderi aýrýhanadaǵy beınebaqylaý jazbalaryn zerdelegen. Іshki tekserý qorytyndysy boıynsha dáriger tarapynan medıtsınalyq etıka men deontologııa talaptaryn buzý nemese janjalǵa sebep bolatyn áreketter anyqtalmaǵan. Oqıǵaǵa sol ýaqytta qabyldaý bóliminde bolǵan ózge naýqastardyń ata-analary da kýá bolǵan.

Basqarma buǵan deıin balanyń aýrýhanaǵa birneshe ret júgingenin de habarlady. Resmı málimetke sáıkes, 19 qazanda bala hırýrgııa bólimine jatqyzylyp, dıagnostıkalyq laparoskopııalyq appendektomııa jasalǵan. 22 qazanda anasy óz ótinishimen statsıonarlyq emdi jalǵastyrýdan bas tartqan. Al 25 qazanda qaıta júgingen kezde ata-anasy emdi jalǵastyrýǵa kelispegen. Medıtsınalyq qujattarda anasynyń medıtsına qyzmetkerlerine eshqandaı shaǵymy men talaby joq ekeni týraly qolhaty bar.

Oqıǵadan keıin aýrýhana qyzmetkerleri polıtsııa shaqyryp, zardap shekken dáriger resmı aryz túsirgen. Mańǵystaý oblystyq polıtsııa departamenti atalǵan derek boıynsha qylmystyq is qozǵalǵanyn habarlady. Kúdikti ustalyp, ýaqytsha ustaý ızolıatoryna qamaldy.

Buǵan deıin Aqtaýda dárigerge shabýyl jasaǵan er adam qamaýǵa alyndy.