Dárigerdi urǵan adam ómir boıy ótemaqy tóleýi kerek — depýtat

ASTANA. KAZINFORM – Elde medıtsına qyzmetkerlerine kúsh kórsetý derekteri jıilep barady. Májilis depýtaty Ashat Aımaǵambetov bul máselege zań júzinde naqty ári qatań sharalar qabyldaý qajet ekenin aıtyp otyr. 

Ashat Aımaǵambetov dárigerlerge jasalǵan shabýyl polıtsııa qyzmetkerlerine shabýyl jasaýmen teńestirilip, qylmystyq jaýapkershilik kúsheıtilýi tıis ekenin aıtady.  

— Qazaqstanda basqa eshbir mamandyq medıtsına qyzmetkerlerindeı jıi agressııaǵa tap bolmaıdy. Onyń saldary qazirdiń ózinde baıqalyp jatyr. Dárigerler jumystan ketip jatyr, óıtkeni ózin qaýipsiz sezinbeıdi. Sondyqtan biz, buǵan deıin úsh ret Qylmystyq kodekske ózgerister usyndyq. Dárigerge shabýyl jasaǵan adamǵa qatysty bólek bap, qatań jaza bolýy kerek. Bul jaza polıtsııaǵa nemese ormanshyǵa shabýyl jasaýmen teń bolýy tıis. Eger dáriger sonyń kesirinen jumysqa jaramaı qalsa, kináli adam moraldyq ta, materıaldyq ta ótemaqy tóleýi kerek. Qajet bolsa ómir boıy tólesin, — deıdi depýtat.

Ol bul bastama qoldaý tappaǵanyn aıtady. 

— Alaıda osy kúnge deıin bul bastamalarymyz Úkimettiń qorytyndylarynda qoldaý tappady, — dedi Ashat Aımaǵambetov.

Depýtat jaqynda bolǵan dárigerlerge qatysty jaǵdaıǵa ústirt qaraýǵa bolmaıtynyn aıtty.

— Qaraǵandyda bir azamat aǵa medbıkeni jumys ornynda soqqyǵa jyqqan. Medbıke basynan jaraqat alǵan, saýsaqtary synǵan, denesi kógerip, shashy julynyp, aýyr soqqyǵa ushyraǵan. Al Qostanaıda hırýrg-ýrologqa shabýyl jasaldy. «Meni kezeksiz kirgizbedi» dep ashýlanǵan naýqas dárigerdi urǵan eken. Saldarynan ol aýyr jaraqatpen aýrýhanaǵa tústi. Basynan qan ketken, súıegi synǵan. Muny jaı ǵana «kezdeısoq jaǵdaı» deýge bolmaıdy. Bul degenimiz tek dárigerler úshin emes, árqaısymyz úshin qaýipti shabýyl, — dedi Aımaǵambetov.

Ol mundaı jaǵdaılar ádetke aınalyp bara jatyr degendi atap ótti.

— Eń soraqysy, medıtsına qyzmetkerlerine qol kóterý, ásirese jedel járdem men emhana dárigerlerine kúsh qoldaný ádetke aınalyp barady. Sondyqtan oǵan dereý toqtaý salyp, zańmen shekteý qoıý kerek. Shyny kerek, Prezıdent bul másele boıynsha naqty tapsyrmany buǵan deıin de bergen edi: dárigerlerdiń qaýipsizdigin qamtamasyz etý qajet. Eń bastysy - osy tapsyrmany oryndaý. Halyqaralyq tájirıbe de bizdiń usynysymyz durys ekenin kórsetedi. Eýropa elderinde dárigerge shabýyl jasaý polıtsııaǵa shabýyl jasaýmen teń. Onda mundaı áreket úshin naqty, qatań jaza bar. Memleket dárigerdi qatty qorǵaıdy. Bizde de solaı bolýy kerek.

Buǵan qosa, taǵy bir mańyzdy baǵytpen aınalysyp jatyrmyz. Ol - dárigerlerdi kásibı táýekelderden mindetti saqtandyrýdy keńeıtý. Jumys ornyndaǵy zorlyq-zombylyq pen jaraqattar da saqtandyrýǵa kirýi tıis.

Osy kúzde biz bul zańdar boıynsha tıimdi sheshim qabyldanady dep senemin, — dedi depýtat.

Aıta ketelik Qaraǵandy oblysynda er adam eki dárigerdi soqqyǵa jyqqan edi.