Dárigerdiń sertıfıkatyn qalaı tekserýge bolady
ASTANA. KAZINFORM – Dárigerdiń belgili bir mamandyq boıynsha patsıent qabyldaýǵa quqyǵy bar-joǵyn kez kelgen azamat resmı júıe arqyly teksere alady. QR Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıteti Kazinform saýalyna bergen jaýabynda dárigerdiń maman sertıfıkaty týraly aqparatty qaıdan kórýge bolatynyn túsindirdi.
Komıtet tóraǵasynyń orynbasary Jandos Ádilhannyń málimetinshe, medıtsına qyzmetkerlerin sertıfıkattaý elektrondy formatta eLicense portaly arqyly júrgiziledi.
Azamattar medıtsına qyzmetkeri týraly derekterdi osy portaldaǵy «Ruqsat berý qujattaryn izdeý» bóliminen ala alady. Ol úshin medıtsına qyzmetkeriniń derekteri qajet.
– Maman sertıfıkaty dárigerge belgili bir mamandyq nemese mamandandyrý boıynsha klınıkalyq praktıkamen aınalysýǵa múmkindik beredi. Qoldanystaǵy talap boıynsha, medıtsına qyzmetkeri klınıkalyq praktıkaǵa jiberilý úshin tıisti mamandyq nemese mamandandyrý boıynsha maman sertıfıkatyna ıe bolýy tıis, - dedi spıker.
Bul talap dáriger birneshe medıtsınalyq mamandyq boıynsha jumys istegen jaǵdaıda da qoldanylady. Komıtettiń túsindirýinshe, dáriger árbir mamandyq boıynsha klınıkalyq praktıkamen aınalysýǵa ruqsat beretin sertıfıkatqa ıe bolýy kerek.
Qazir jańa mamandyq boıynsha maman sertıfıkatyn alý úshin dáriger sol mamandyq boıynsha rezıdentýrany aıaqtaǵany týraly kýálik usynýy qajet.
– Al buǵan deıin, ıaǵnı 2022 jylǵy 15 qarashaǵa deıin basqa tártip qoldanyldy. Ol kezde jańa mamandyq boıynsha sertıfıkat qaıta daıarlaýdan ótkenin rastaıtyn qujat negizinde de berildi. Mundaı qaıta daıarlaý keminde 860 saǵattyq oqýdy talap etti. Sonyń nátıjesinde keıbir tájirıbeli dárigerlerde bir kásibı beıinge jatatyn eki nemese odan da kóp mamandyq boıynsha sertıfıkat bolýy múmkin, - dedi komıtet tóraǵasynyń orynbasary.
Osylaısha, patsıent dárigerge jazylmas buryn onyń tıisti mamandyq boıynsha sertıfıkaty bar-joǵyn eLicense portalynan teksere alady.
