Dárigerdiń mártebesin kóterý: eńbekaqy tóleý júıesi ózgere me

- Pandemııa densaýlyq saqtaý júıesiniń turaqtylyǵy tek medıtsınalyq jabdyqtar men dári-dármekterge ǵana baılanysty emes ekenin kórsetti. Eń bastysy bul – medıtsınalyq kadrlar. Sondyqtan dáriger mártebesin tek áleýmettik ádilettilik máselesi dep qaraýǵa bolmaıdy. Bul – eldiń bıologııalyq jáne ulttyq qaýipsizdigine tikeleı qatysty másele. Basty mindettiń biri – dárigerlerdiń mártebesin kóterý jáne mamandyqtyń bedelin nyǵaıtý. Dárigerlerdiń qaýipsizdigin qatań baqylaý – bizdiń aıryqsha nazarymyzda, - dedi D. Medeýova.

Onyń sózine qaraǵanda, eńbekaqy tóleý júıesi ıkemdi bolýy kerek. Ol dárigerdiń biliktiligin eskerip, ony kásibine qatysy joq, bıýrokratııalyq mindetten bosatýy tıis. Dáriger esep-qısaptyń sheksiz qujatyn toltyrmaı, naýqasty emdeýi kerek.

- «Dáriger» zańmen qorǵalýy tıis. Bul ataýdyń artynda medıtsınalyq bilim, rastalǵan biliktilik jáne kásibı qyzmetpen aınalysý quqyǵy turýy kerek. Kadr tapshylyǵyna obektıvti baǵa berý qajet. Jańa dárigerlerdi tartý ǵana emes, qazir júıede eńbek etip júrgen mamandardy ustap qalý da mańyzdy. Ulttyq qaýipsizdikke qater tóngen jaǵdaıda, dárigerlerdiń jedel ári derbes áreket etýine múmkindik berilýi tıis. Ol úshin olardyń ókilettigi naqty aıqyndalyp, kásibı sheshimderi zańmen qorǵalýy qajet. Atalǵan máselelerdi júıeli túrde sheshý qajet. Osyǵan baılanysty men «Medıtsına qyzmetkerleriniń kásibı mártebesi men qyzmetiniń kepildikteri týraly» zań jobasyna bastamashylyq etemin, - dedi depýtat.

Osy oraıda ol bilikti dárigerdi daıarlaýǵa keminde on jyl qajet ekenin eske saldy.

- Bizdiń mindetimiz – dárigerlerdiń tómen jalaqyǵa baılanysty mamandyǵyn tastap ketpeýine jaǵdaı jasaý. Bilimi men tájirıbesi el ıgiligine qyzmet etýi úshin olardyń eńbegin laıyqty baǵalaýymyz kerek, - dedi Dana Medeýova.

Buǵan deıin dárigerlerdi qoldaý tetikteri qandaı nátıje bergenin jazǵa edik.