Dárigerdiń qateliginen patsıent zardap shekse, ótemaqyny kim tóleıdi
ASTANA. KAZINFORM — Qazaqstanda sońǵy eki jyldyń ishinde medıtsına qyzmetkerleriniń kásibı jaýapkershiligin mindetti saqtandyrý sheńberinde patsıentter men olardyń otbasylaryna saqtandyrý tólemderi retinde 502,6 mln teńgeden astam qarajat tólendi.
Memleket basshysynyń tapsyrmasy boıynsha ázirlengen «Medıtsına qyzmetkerleriniń kásibı jaýapkershiligin saqtandyrý týraly» zań 2024 jylǵy qazan aıynda kúshine endi.
Densaýlyq saqtaý mınıstrligi baspasóz qyzmetiniń málimetinshe, 2026 jylǵy 1 qyrkúıektegi jaǵdaı boıynsha 178 296 medıtsına qyzmetkeri saqtandyrylǵan. Onyń ishinde 155 856-sy memlekettik medıtsınalyq uıymdarda, taǵy 22 440-y jekemenshik uıymdarda eńbek etedi.
— 2026 jyldyń basynan beri medıtsınalyq uıymdar 1 867 saqtandyrý shartyn jasasty. Bul tetik medıtsınalyq kómek kórsetý kezinde patsıenttiń ómiri men densaýlyǵyna keltirilgen zııan rastalǵan jaǵdaıda oǵan saqtandyrý tólemin alýǵa, al medıtsına qyzmetkerlerine tıisti qaýipterden qarjylyq qorǵanýǵa múmkindik beredi. Eger patsıent nemese onyń zańdy ókili medıtsınalyq kómek kórsetý barysynda ómiri men densaýlyǵyna zııan keltirildi dep eseptese, medıtsınalyq uıymǵa júginýge quqyly, — delingen habarlamada.
Bul jaǵdaıdy táýelsiz saraptama komıssııasy (TSK) qaraıdy. Onyń quramyna beıindi mamandar, kásibı medıtsınalyq qaýymdastyqtardyń jáne Biryńǵaı saqtandyrý pýlyna qatysýshy saqtandyrý uıymynyń ókilderi kiredi.
— Qaralyp otyrǵan jaǵdaı oryn alǵan medıtsınalyq uıymnyń qyzmetkerleri komıssııa quramyna engizilmeıdi. Sarapshylar medıtsınalyq qujattamany jáne medıtsınalyq kómek kórsetý jaǵdaılaryn zerdeleıdi. Saqtandyrý jaǵdaıy rastalǵan kezde saqtandyrý tólemin zańnamada belgilengen tártippen saqtandyrý uıymy patsıentke nemese onyń ókiline tóleıdi. Bul rette patsıent atalǵan somany medıtsına qyzmetkerinen tikeleı óndirip alýdyń qajeti joq, — delingen habarlamada.
Medıtsına qyzmetkerleri úshin de saqtandyrý qarjylyq qorǵaýdy qamtamasyz etedi: saqtandyrý medıtsınalyq uıymnyń qarajaty esebinen júzege asyrylady, al saqtandyrý jaǵdaıy týyndaǵan kezde belgilengen shekterde tólemdi saqtandyrý kompanııasy júrgizedi. Osylaısha, bul tetik zııan keltirilgeni rastalǵan jaǵdaılardy zańda belgilengen tártippen retteýge múmkindik beredi: patsıent saqtandyrý tólemin alady, al medıtsına qyzmetkeri ony óz qarajaty esebinen óteý qajettiliginen qorǵalady.
Budan buryn Almatyda dárigerler kózine tas kirgen naýqastyń kórý qabiletin saqtap qalǵanyn jazǵanbyz.
