Dárigerdiń qateliginen naýqas japa shekse, qansha ótemaqy alady
ASTANA. KAZINFORM — Dárigerdiń qateliginen naýqas múgedek bolyp qalsa, 3 145 600 teńgege deıin ótemaqy tólenedi. Bul týraly Kazinform agenttiginiń resmı saýalyna bergen jaýabynda Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıtetinen habarlady.
Eger dárigerdiń qateliginen naýqastyń densaýlyǵyna zııan kelse, japa shekken azamat ótemaqy óndirýge quqyly. Ol úshin patsıent nemese onyń týystary em alǵan medıtsınalyq uıymnyń ishki saraptama qyzmetine shaǵymdana alady
- QR Halyq densaýlyǵy jáne densaýlyq saqtaý júıesi týraly Kodeksiniń 270-2-babyna sáıkes, densaýlyq saqtaý sýbektisi patsıentti qoldaý jáne ishki saraptama qyzmetinen patsıenttiń ne onyń jubaıynyń, jaqyn týystarynyń nemese zańdy ókiliniń medıtsınalyq qyzmetti júzege asyrý nátıjesinde patsıenttiń ómiri men densaýlyǵyna zııan keltirilgeni týraly joldanymy kelip túsken kúnnen bastap úsh jumys kúni ishinde táýelsiz saraptama komıssııasyn qurady. TSK qyzmetiniń tártibi jáne zııan keltirý faktisin anyqtaýǵa qoıylatyn mınımaldy talaptar QR Densaýlyq saqtaý mınıstriniń 2024 jylǵy 28 maýsymdaǵy № 40 buıryǵymen retteledi, - delingen jaýapta.
Japa shekken patsıentke beriletin ótemaqy mólsheri onyń densaýlyq jaǵdaıyna baılanysty. Ony táýelsiz saraptamalyq komıssııa anyqtaıdy. Komıssııa quramyna patsıenttiń densaýlyǵyna zııan tıgizgen mekemeniń mamandary kire almaıdy.
- Patsıenttiń ómiri men densaýlyǵyna zııan kelip, múgedektik belgilense:
Úshinshi top múgedektigine – 500 AEK
Ekinshi top múgedektigine – 600 AEK
Birinshi top múgedektigine – 800 AEK
Múgedektigi bar bala – 500 AEK
- Patsıenttiń ólimine alyp kelgen zııan úshin – 3 000 AEK
- Al múgedektik belgilenbegen, biraq densaýlyǵyna zııan keltirilgen jaǵdaıda naýqastyń emge ketken barlyq shyǵyny eseptelip, qaıtarylady. Biraq bul somma 300 AEK-ten aspaýy kerek.
Aıta keteıik, 2025 jyly 1 aılyq eseptik kórsetkish (AEK) mólsheri 3 932 teńge bolyp bekitildi.