Dárigerdiń betine túkirgen aqtóbelik aıyppul tóleıdi

AQTÓBE. KAZINFORM — Іs Aqtóbe qalasynyń mamandandyrylǵan ákimshilik quqyq buzýshylyqtar jónindegi aýdanaralyq sotynda qaraldy. Aqtóbelikke 117 960 teńge aıyppul salyndy. 

Aqtóbe qalasynyń mamandandyrylǵan ákimshilik quqyq buzýshylyqtar jónindegi aýdanaralyq soty baspasóz qyzmetiniń habarlaýynsha, oqıǵa bıyl naýryz aıynda bolǵan. № 3 qalalyq emhanasynyń balalar oftalmolog dárigerine qaralǵan aqtóbelik dórekelik kórsetip, tipti qyzmettik mindetin atqaryp jatqan onyń betine túkirgen. Іs Ákimshilik quqyqbuzýshlyq týraly kodekstiń 80-1-babyn 2-bóligi boıynsha qaraldy. 

— Ákimshilik quqyqbuzýshlyq týraly kodekstiń 80-1-babyn 2-bóligine sáıkes bul quqyq buzýshylyq úshin 30 aılyq eseptik kórsetkish mólsherinde aıyppul salý nemese 10 táýlikke deıin ákimshilik qamaýǵa alý túrindegi jaza kózdelgen. Sot otyrysynda azamatsha óz kinásin moıyndamady, dáriger-oftalmologqa qurmetsizdik kórsetkenin joqqa shyǵardy. Sot azamatsha A-ny ákimshilik quqyq buzýshylyqty jasaǵany úshin kináli dep tanyp, oǵan 117 960 teńge mólsherinde ákimshilik aıyppul salý týraly qaýly shyǵardy. Sot qaýlysy zańdy kúshine engen joq, — dep habarlady Aqtóbe qalasynyń mamandandyrylǵan ákimshilik quqyq buzýshylyqtar jónindegi aýdanaralyq sotynyń baspasóz qyzmeti.

Buǵan deıin habarlaǵanymyzdaı, 2019 jyldan bastap búginge deıin, ıaǵnı 5,5 jyl aralyǵynda Qazaqstanda dárigerlerge, feldsherlerge, meıirgerler men basqa da densaýlyq saqtaý mekemesiniń qyzmetkerlerine qatysty 170-ten astam qylmys jasalǵan.