Dárigerdi soqqyǵa jyǵý áreketterine jaza kúsheıtiledi — zań jobasy

ASTANA. KAZINFORM — Parlament Májilisiniń qaraýyna «QR Qylmystyq kodeksine jáne QR Qylmystyq-protsestik kodeksine tolyqtyrýlar engizý týraly» zań jobasy kelip tústi.

— Bul mańyzdy zań jobasy dárigerler men medıtsına qyzmetkerlerin qorǵaý úshin ázirlendi. Onda medıtsına ókilderine qatysty zorlyq-zombylyq úshin jazany aıtarlyqtaı qatańdatý jónindegi naqty normalardy usyndyq. Sońǵy jyldary mundaı jaǵdaılar kóbeıip barady. Bir dáriger jumys ornynda soqqyǵa jyǵylsa, taǵy biri jedel járdem shaqyrǵan úıden qorlyq kórdi. Osyndaı kórinisterge jol berýge bolmaıdy, — dedi depýtat Ashat Aımaǵambetov Májilistiń jalpy otyrysynda.

Osy oraıda ol Memleket basshysy bul máseleni birneshe ret kóterip, tısti tapsyrma bergenin eske saldy.

— Osy jazda da Prezıdent depýtattardyń bastamasyn qoldap, Úkimetke naqty tapsyrma bergen edi. Sondyqtan Májilistiń Áleýmettik-mádenı damý komıteti osy zań jobasy boıynsha qorytyndy ázirleýge daıyn, — dedi depýtat.

Eske salsaq, bıyl jazda Qostanaıda dárigerdi soqqyǵa jyqqan buzaqy eki aıǵa qamaýǵa alyndy. 

Sonymen qatar, maýsym aıynda Qaraǵandy oblysynda er adam eki dárigerdi soqqyǵa jyqqany málim boldy.