Dárigerdi sabap, máıitti urlaǵan: Almaty oblysynyń aýrýhanasynda janjal shyqty

Talǵar aýdandyq ortalyq aýrýhanasynda qaıtys bolǵan naýqastyń uldary jansaqtaý bóliminiń dárigeri men meıirgerin soqqyǵa jyqty. Zardap shekken medıtsına qyzmetkerleriniń jaǵdaıy aýyr, dep habarlaıdy QazAqparat tilshisi.

Talǵar aýdandyq aýrýhanasynyń málimetinshe, ákesiniń qaıtys bolǵanyn estigen uldary medıtsına qyzmetkerlerine kúsh kórsetip, marqumnyń denesin alyp ketken. Densaýlyq mekemesindegi janjal vıdeosy áleýmettik jelide tarady. 

«Qaıtys bolǵan er adamnyń uldary kisi ólimi týraly dáriger anyqtamasynyń resmı rásimin kútpesten jansaqtaý bólimine kirip, ondaǵy dáriger men meıirgerdi soqqyǵa jyqty, marqumnyń denesin medıtsınalyq tósek arbamen birge urlap ketti», - delingen Talǵar aýdandyq ortalyq aýrýhanasynyń ákimshiligi taratqan málimette.

Jasalǵan shabýyl saldarynan anestezıolog-reanımatolog dárigerge bas mıynyń jaraqaty, kóptegen teriasty gematomasy, keńsiriktiń jabyq synyǵy dıagnozy qoıyldy. Meıirgerge mıdyń jabyq jaraqaty, mańdaıdyń jumsaq tinderiniń kógerýi, murynnyń jabyq synyǵy dıagnozy qoıyldy.

«Shaqyrtý boıynsha oqıǵa ornyna jetken Talǵar aýdandyq polıtsııa qyzmetkerleri qaıtys bolǵan adamnyń denesin qaıtarý jáne dárigerlerge shabýyl jasaǵany úshin kinálilerdi ustaý boıynsha qajetti sharalar qabyldady. Atalǵan faktige alda quqyqtyq baǵa beriledi»,- dep atap ótti aýrýhanadan.