Dárigerdi qorǵaý Zań men tártip qaǵıdatyna tolyq saı keledi – Prezıdent
ASTANA. KAZINFORM – Memleket basshysy Qasym-Jomart Toqaev medıtsına qyzmetkeri kúnine arnalǵan saltanatty is-sharada densaýlyq saqtaý salasyndaǵy jetistikterge toqtaldy.
Barshańyzǵa belgili, memleket medıtsına salasyn damytýǵa árdaıym basa nazar aýdarady. Qazir de osy baǵytta aýqymdy jumys istelip jatyr. Naqty nátıjeler bar.
– Byltyr elimiz boıynsha azamattardyń ortasha ómir súrý uzaqtyǵy 76 jasqa jaqyndady. Sońǵy úsh jylda ana ólimi 35 paıyzǵa, al sábı ólimi 24 paıyzǵa qysqardy. Bul – Táýelsizdik jyldaryndaǵy eń tómengi kórsetkish. Keıingi jeti jylda elimiz boıynsha 1300-ge jýyq densaýlyq saqtaý nysany salyndy. Medıtsınalyq saqtandyrý salasy da zaman talabyna saı jańǵyrtyldy, – dedi Qasym-Jomart Toqaev.
Qazirgi tańda densaýlyq saqtaý júıesinde 280 myńnan astam maman qyzmet etedi. Olardyń mártebesin kóterý jáne bedelin kúsheıtý elimiz úshin basymdyqqa ıe mindet bolyp qala beredi.
Bul rette Prezıdent medıtsına qyzmetkerlerine kúsh kórsetken adamdardy qylmystyq jaýapkershilikke tartý týraly pikir bildirdi.
– Dárigerlerdiń qaýipsizdigin qatań qadaǵalaý jumysy aıryqsha nazarda bolýǵa tıis. Osy máselege byltyr kásibı mereke qarsańynda ótken jıynda arnaıy toqtaldym. Sol sebepti men osy jyldyń basynda medıtsına qyzmetkerlerine kúsh kórsetken adamdardy qylmystyq jaýapkershilikke tartý týraly Zańǵa qol qoıdym. Bul sheshim qoǵamymyzda berik ornyǵyp jatqan Zań men tártip qaǵıdatyna tolyq saı keledi, – dedi Memleket basshysy.
Aıta keteıik, Aqordada Prezıdent medıtsına qyzmetkerlerin kásibı merekesimen quttyqtady. Elimizde maýsymnyń ər úshinshi jeksenbisi – medıtsına qyzmetkerleriniń kúni. Bul kúndi atap ótý QR Prezıdentiniń 1998 jylǵy Jarlyǵymen belgilengen.
Jańa Konstıtýtsııada «ult saýlyǵy» uǵymyna alǵash ret nazar aýdaryldy.
