Dáriger júktemesin azaıtady: Aqmola oblysynda JI-assıstent jobasy engizildi
ASTANA. KAZINFORM — Oblystyń birneshe qalasynda medıtsına qyzmetkerlerine túsetin ákimshilik júktemeni azaıtý maqsatynda dárigerlerge JI-assıstent qolǵabys bolyp jatyr.
— Jalpy 43 jańa nysan salyndy, onyń ishinde 38-i «Aýylda densaýlyq saqtaýdy janǵyrtý» ulttyq jobasy aıasynda júzege asyryldy. Bul nysandar 130 myń aýyl turǵynyn sapaly medıtsınalyq qyzmetpen qamtamasyz etip otyr. Kókshetaý qalasynda 630 orynǵa arnalǵan jańa kópbeıindi aýrýhananyń qurylysy bastaldy. Aýrýhana Qazaqstanda balamasy joq halyqaralyq deńgeıdegi klınıkaǵa aınalady. Ol jerde soltústik óńir turǵyndaryna joǵary mamandandyrylǵan medıtsınalyq kómek kórsetiledi. Sondaı-aq, Qosshy qalasynda 1 myń adamǵa arnalǵan emhanasy bar kópbeıindi aýrýhananyń qurylysy aıaqtalyp qaldy. Kelesi jyly qańtarda alǵashqy naýqastardy qabyldaı bastaıdy, — dedi Aqmola oblysynyń ákimi Marat Ahmetjanov ortalyq kommýnıkatsııalar qyzmeti alańynda óńirdiń áleýmettik-ekonomıkalyq damý áleýeti týraly esep bere turyp.
Oblys basshysynyń málimetinshe, oǵan qosa 2026 jyldyń birinshi jartyjyldyǵynda Qosshyda 350 tósek-oryndyq aýrýhana ashylady dep josparlanyp otyr.
— Aýrýhana Qosshy qalasy men oblystyń jeti jaqyn aýdan turǵyndaryn emdeıdi. Ol jerde 1700 jumys orny qurylady. Odan bólek, bıyl qyrkúıekte Stepnıak qalasynda medıtsınalyq keshenniń qurylysy aıaqtaldy, keshen 200 naýqasqa deıin qabyldaı alady, ıaǵnı 45 tósek-oryn bar, — deıdi ol.
Sondaı-aq ákim densaýlyq saqtaý salasynda jasandy ıntellekt júıesi engizilip jatqanyn tilge tıek etti.
— Medıtsına qyzmetkerlerine ákimshilik júktemeni tómendetetin dárigerdiń JI-assıstent jobasy engizildi, — dep tolyqtyrdy Marat Ahmetjanov.
Ákimdiktiń málimeti boıynsha búginde Kókshetaý, Stepnogorsk, Qosshy jáne Aqkól qalasynda JI assıstenttiń kómegi tıip jatyr. Júıe qabyldaýdy tirkeıdi, mańyzdy aqparatty alady, qujattamany toltyrady jáne 80% deıin naqty aldyn ala dıagnozdy usynady.
Buǵan deıin Marat Ahmetjanov Aqmola oblysynda apatty jaǵdaıdaǵy jáne úsh aýysymdy mektepter máselesi tolyq sheshilgenin málim etti.
Aıta keteıik, jyl basynan beri 7 myńnan astam aqmolalyq baspanamen qamtyldy.
Sondaı-aq bıyl Aqmola oblysynyń dıqandary rekordtyq kólemde astyq jınady.