Dáriger jazda taǵamnan ýlanýdan qalaı saqtanýǵa bolatynyn aıtty
ASTANA. KAZINFORM — Jazda taǵamnan ýlaný qaýpi áli de bar. Sondyqtan mamandar qoǵamdyq tamaqtaný oryndaryn tańdaǵanda muqııat bolyp, tez buzylatyn taǵamdardy tutynýda saqtyq sharalaryn ustanýǵa shaqyrady.
Bul týraly Ortalyq kommýnıkatsııalar qyzmetinde ótken brıfıngte QR Densaýlyq saqtaý mınıstrligi Sanıtarııalyq-epıdemıologııalyq baqylaý komıtetiniń tóraǵasy Sarhat Beısenova aıtty.
Onyń sózinshe, toptyq taǵamnan ýlaný jaǵdaılary azaıǵanymen, qaýip tolyq joıylǵan joq. Ásirese jazdyń ystyq kúnderi sanıtarııalyq-gıgıenalyq talaptardyń saqtalmaýy ýlanýǵa ákelýi múmkin.
— Taǵam qaýipsizdigi tek kásipkerlerge ǵana emes, tutynýshylardyń saqtyǵyna da baılanysty. Qoǵamdyq tamaqtaný oryndaryn tańdaǵanda olardyń senimdiligi men bedeline mán bergen jón. Ystyqta jańadan daıyndalǵan taǵamdy tańdaǵan durys. Al jylýmen óńdelmegen ónimderdi, sonyń ishinde sýshı, roll, teńiz ónimderi men tez buzylatyn basqa da taǵamdardy tutynǵanda erekshe saq bolǵan abzal, — dedi Sarhat Beısenova.
Ol turǵyndarǵa taǵamdy tıisti temperatýrada saqtaýdy, azyq-túlikti ruqsat etilmegen jerden satyp almaýdy, sondaı-aq daıyn taǵamdy, ásirese saqtaý ne tasymaldaý talaptary buzylǵan jaǵdaıda, uzaq ustamaýdy usyndy.
Sarhat Beısenova qoǵamdyq tamaqtaný salasyndaǵy kásipkerlerge de sanıtarııalyq talaptardy qatań saqtaýdyń mańyzyn eske saldy.
— Kásipkerler zańnamada kózdelgen barlyq ruqsat qujattaryn rásimdep, qyzmetkerlerdiń mindetti medıtsınalyq tekserýden ýaqytyly ótýin qamtamasyz etýi kerek. Shıkizatty sapasy men qaýipsizdigin rastaıtyn qujattary bar senimdi jetkizýshilerden alyp, taǵam daıyndaý tehnologııasyn, saqtaý tártibi men jaramdylyq merzimin qatań saqtaýy tıis, — dedi komıtet tóraǵasy.
Aıta keteıik, buǵan deıin dáriger kene shaqqan jaǵdaıda ne isteý kerektigi týraly keńes bergen edi.
