Dáriger: Terezeden qulaǵan balalardyń kóbi — bes jasqa deıingiler
ASTANA. KAZINFORM — Jazda balalardyń terezeden qulaý qaýpi arta túsedi. Astananyń balalar hırýrgi Dınat Qojekenov mundaı oqıǵalardyń saldary qandaı bolatynyn, nelikten masaǵa qarsy torǵa súıenýge bolmaıtynyn jáne balalardy jazataıym jaǵdaıdan qalaı qorǵaýǵa bolatynyn túsindirdi.
Elorda ákimdigi atap ótkendeı, dárigerdiń aıtýynsha, zardap shegýshilerdiń basym bóligi — bes jasqa deıingi balalar. Ásirese eki-tórt jas aralyǵyndaǵy búldirshinder qaýip-qaterdi tolyq túsinbeı, jazataıym jaǵdaılarǵa jıi ushyraıdy.
Dáriger masaǵa qarsy torlardyń erekshe qaýip tóndiretinin atap ótti. Balalar ony senimdi nemese qorǵanysh retinde qabyldaýy múmkin. Alaıda mundaı torlar balanyń salmaǵyn ustap turýǵa arnalmaǵan.
— Masaǵa qarsy torlar óte názik keledi. Olardyń bekitkishteri synyp ketip, bala tormen birge qulap ketýi múmkin, — dedi dáriger.
Bıikten qulaǵan balalar kóbine aýyr jaraqat alady. Olardyń qatarynda aıaq-qol, omyrtqa, qabyrǵa jáne bas súıek synyqtary, sondaı-aq mı men ishki aǵzalardyń zaqymdanýy kezdesedi.
Aýyr jaǵdaılarda balany qutqarýǵa neırohırýrgter, reanımatologtar, hırýrgter, ýrologtar, travmatologtar, oftalmologtar jáne jaq-bet hırýrgteri jumyldyrylady.
Mamannyń aıtýynsha, ekinshi nemese úshinshi qabattan qulaýdyń ózi óte qaýipti. Jaraqattyń aýyrlyǵy tek bıikke ǵana emes, balanyń qalaı qulaǵanyna jáne qandaı aǵzalary zaqymdanǵanyna da baılanysty.
— Ekinshi qabattan qulap, sońy ólimmen aıaqtalǵan jaǵdaılar bolǵan. Sondyqtan tómengi qabattan qulaý qaýipsiz dep aıtýǵa bolmaıdy, — dedi ol.
Eń qaýiptisi — bas jaraqattary, mıdyń jáne ishki aǵzalardyń zaqymdanýy. Tipti jeńil kórinetin synyqtardyń ózi aýyr jaraqattyq shokqa ákelýi múmkin.
Dárigerdiń sózinshe, balanyń syrtqy jaǵdaıyna qarap jaraqattyń qanshalyqty aýyr ekenin árdaıym anyqtaý múmkin emes. Sondyqtan terezeden qulaǵan kez kelgen jaǵdaıda dereý jedel járdem shaqyrý qajet.
Dárigerler kelgenge deıin balany ornynan qozǵaltpaý kerektigin eskertedi. Tek ol jol ústinde nemese ózge de qaýipti jerde jatqan jaǵdaıda ǵana qaýipsiz orynǵa kóshirýge bolady. Eger qan ketse, ony tańǵyshpen toqtatýǵa tyrysyp, birden jedel járdem shaqyrý kerek.
Sondaı-aq dáriger mundaı jaǵdaıda halyq emine júginýge bolmaıtynyn eskertti.
— Jaraqat jeńil kóringenniń ózinde, terezeden qulaý faktisiniń ózi 103 qyzmetine habarlasýǵa jetkilikti sebep, — dedi Dınat Qojekenov.
Onyń aıtýynsha, qaıǵyly jaǵdaılardyń negizgi sebepteri — terezelerde arnaıy bekitkishterdiń bolmaýy jáne balalardy az ýaqytqa bolsa da qaraýsyz qaldyrý.
Dáriger kishkentaı balalardy jasóspirimderdiń qaraýyna qaldyrmaýdy da erekshe atap ótti. Óıtkeni úlkendeý balalar men jasóspirimder bir mezetke kóńili bólinip ketse, búldirshinniń ashyq tereze mańyna barǵanyn ańǵarmaı qalýy yqtımal.
Mamannyń pikirinshe, mundaı oqıǵalardyń aldyn alý úshin úsh qarapaıym erejeni saqtaý qajet: Terezelerge arnaıy qaýipsizdik bekitkishterin ornatý, qorǵanys quraldary joq bolsa terezeni ashyq qaldyrmaý jáne balalardy terezege ońaı jaqyndaı alatyn bólmede qaraýsyz qaldyrmaý kerek.
Osydan buryn Almatyda jyl basynan beri tórt bala terezeden qulap ketkenin jazǵanbyz.
