Dáriger tapshylyǵy azaıdy
ASTANA. KAZINFORM — Úkimette sóz bolǵan densaýlyq saqtaý júıesin jańǵyrtý máselesine qatysty kóterilgen máselelerdiń biri — dáriger tapshylyǵyn azaıtý, aýyl-aımaqtardy bilikti medıtsına mamandarymen qamtamasyz etý.
2025 jyly elimizdegi medıtsınalyq joǵary oqý oryndaryn 10,5 myń maman támamdady, olardyń 34%-y aýyldardaǵy medıtsınalyq uıymdarǵa bólindi. Bul byltyrǵymen salystyrǵanda shamamen eki ese joǵary.
Óńirlerdegi qajettilikterdi eskere otyryp, bıyl 5 myńnan astam bilim granty bólindi. 2024 jyldyń qazan aıynan beri 16 tapshy mamandyq boıynsha aýyldarda jumys istep júrgen 254 dáriger 8,5 mln teńge kóleminde bir rettik tólem aldy. 2025 jyly taǵy 105 mamanǵa osyndaı qoldaý kórsetildi.
Qabyldanǵan sharalardyń nátıjesinde elimizdegi dáriger tapshylyǵy 19%-ǵa, orta sanatty medıtsına qyzmetkerleri tapshylyǵy 13%-ǵa azaıdy. Aýyldyq jerlerdegi kadr tapshylyǵy 17%-ǵa tómendedi.
1 qyrkúıekten bastap alty negizgi baǵyt boıynsha (onyń ishinde terapııa, pedıatrııa jáne hırýrgııa) ınternatýrada, sondaı-aq pedıatrııa baǵytyndaǵy 14 mamandyq boıynsha rezıdentýrada oqytý bastaldy.
Dáriger mamandaryn daıarlaý sapasyn arttyrý maqsatynda jalpy bilim berý pánderiniń kólemin qysqartý esebinen bazalyq pánderge bólinetin oqý júktemesi 10 kredıtke ulǵaıtyldy.
Oqý baǵdarlamalarynyń sapasy kóterildi, bazalyq pánderdiń úlesi artty, sondaı-aq mamandardy daıarlaýǵa halyqaralyq standarttar engizilip jatyr.
Atap aıtqanda, 1 qyrkúıekten bastap Qaraǵandy medıtsınalyq ýnıversıteti men Qazan federaldyq ýnıversıteti arasynda alǵash ret eki dıplom baǵdarlamasy iske qosyldy. Baǵdarlama boıynsha 70 stýdent oqýǵa qabyldandy. Sondaı-aq Pákistan medıtsınalyq ýnıversıtetiniń fılıalyn ashý máselesi pysyqtalyp otyr.
Medıtsınalyq qyzmetkerlerdiń qaýipsizdigin qamtamasyz etý maqsatynda densaýlyq saqtaý qyzmetkerlerine qol kóterý oqıǵalaryna qatysty Qylmystyq kodekske jeke bap engizý bastamasy kóterildi. Іshki ister mınıstrligimen birlesip is-qımyl jospary ázirlendi: medıtsınalyq uıymdarda 152 polıtsııa beketi ornatyldy. Sondaı-aq memlekettik medıtsınalyq uıymdardyń 98%-y jáne jekemenshik uıymdardyń 76%-y jalpy somasy 3,1 mlrd teńgege kásibı jaýapkershilikti saqtandyrý sharttaryn jasasty.
Aıta keteıik, buǵan deıin elde sábı ólimi byltyrǵy jylmen salystyrǵanda 20,2%-ǵa tómendegenin jazǵan edik.