Dáriger keńesi: 40 gradýstyq ystyqta qalaı qorǵanýǵa bolady
ALMATY. KAZINFORM – Bıylǵy jazda Almaty erekshe ystyq bolyp tur, termometr baǵanyndaǵy kórsetkish qyryqtan asyp ketti.
Sınoptıkter muny Iran men Aýǵanstannan kelip jatqan ystyqpen baılanystyryp otyr. Bul qala turǵyndaryna aýyr tıip jatyr. Jel joq, asfalt qyzyp ketken. Adamdar túgili gadjetter men tehnıkanyń ózi shydamaı jatyr.
Qyryq gradýs ystyqta ne isteý kerektigin Ulttyq gospıtal jedel járdem bólimshesiniń meńgerýshisi Nurseıit Medeýbekov aıtyp berdi.
— Qart kisiler, sozylmaly aýrýlary bar adamdar, júkti áıelder men balalar qaýip tobyna jatady, olarǵa erekshe nazar aýdarý kerek.
Bizge kún ótip ketý, júrek-qan tamyrlary aýrýlarymen, qysymnyń ózgerýimen, álsizdikpen jıi júginedi.
Kún qatty ysyǵanda úı-jaılarda bolǵan jón, bas kıim kııýdi, moıynǵa dymqyl oramal taǵýdy usynamyn, sebebi dál osy aımaq arqyly jylý almasý jyldam júredi.
Ózińizben birge sý alyp júrińiz, kóp sý iship, aǵzada elektrolıtterdiń kóp mólsherde jetispeýine jol bermeý úshin múmkindiginshe sýǵa bir shymshym as tuzyn salyńyz nemese mıneraldy sý ishińiz.
Ystyq túnde jaqsy uıyqtaý, deneni salqyndatý úshin, dymqyl aqjaıma jamylyp, mysyrlyq ádisti qoldanýǵa bolady.
Sińimdiligi jaqsy, jeńil taǵamdar ishińiz. Jańa pisken jemister men kókónister, jarma, ashytylǵan sút ónimderi, ystyq sorpany salqyn túrlerimen aýystyrǵan jón, - deıdi maman.
Eger terezeler kún jaqqa qarasa, jıhazdy, edendi jáne qabyrǵalardy qyzdyryp, «jylý tuzaǵy» áseri paıda bolady. Kúni boıy terezelerdi jáne onyń perdesin jabyq ustaý kerek. Jeldetýdiń tamasha ýaqyty — tún men tańerteńgi ýaqyt. Ashyq tústi kıim bolsa da, jabysyp turatyn kıim kııýge bolmaıdy, termoregýlıatsııanyń negizgi mehanızmi — terdiń tabıǵı býlanýyna jol bermeıdi jáne bul deneniń qyzyp ketýine ákelýi múmkin.
Ystyqta muzdaı dýshqa túsý tamyrlardy taryltady, bul qurysýlar týdyrýy múmkin. Salqyndap alý úshin salqyn sýmen shaıynyp, súlgimen súrtinbegen durys. Kondıtsıonerlerden salqyn tııýi múmkin, abaı bolý kerek.
Maman bul keńestiń barlyǵy kelesi aıda da qajet bolatynyn aıtady, óıtkeni tamyz da ystyq bolady dep boljanyp otyr.