Dáriger qabyldaýynda 6 tańbaly kod nemese Face ID qoldanylady
ASTANA. KAZINFORM – Medıtsınalyq qyzmetterdi negizsiz tirkeýdiń aldyn alý úshin patsıentterdi tsıfrlyq sáıkestendirý tetigi engiziledi. Bul týraly Quryltaı depýtattarynyń saýalyna Densaýlyq saqtaý vıtse-mınıstri Tımýr Sultanǵazıevtiń jaýabynda aıtylǵan.
Vıtse-mınıstrdiń aıtýynsha, tsıfrlyq júıelerdiń úzdiksiz jumys isteýin jáne isten shyǵýǵa ornyqtylyǵyn qamtamasyz etý úshin rezervtik ınfraqurylym paıdalanylady. Sondaı-aq serverlik resýrstardy rezervteý, derekterdiń rezervtik kóshirmelerin jasaý jáne tehnıkalyq aqaýlar týyndaǵan jaǵdaıda aqparattyq júıelerdiń jumysyn qalpyna keltirý tetikteri kózdelgen.
- Atalǵan sharalar tehnıkalyq aqaýlar, ınternet baılanysynyń úzilýi nemese ózge de shtattan tys jaǵdaılar kezinde medıtsınalyq aqparattyń saqtalýyn, derekterdiń joǵalýyna jol bermeýdi jáne medıtsınalyq uıymdardyń úzdiksiz jumys isteýin qamtamasyz etýge baǵyttalǵan. Medıtsınalyq uıymdarǵa júginý arqyly kórsetiletin medıtsınalyq qyzmetterdi negizsiz tirkeýdi azaıtý maqsatynda júıeni transformatsııalaý aıasynda patsıentterdi tsıfrlyq sáıkestendirý tetigi engiziledi, – dedi ol.
Tımýr Sultanǵazıevtiń aıtýynsha, qoldanystaǵy medıtsınalyq-sanıtarııalyq alǵashqy kómek kórsetýdi uıymdastyrý standartyna sáıkes, qabyldaý kezinde medıtsına qyzmetkeri patsıentti sáıkestendirýge mindetti.
Osy rette patsıentterdi tsıfrlyq sáıkestendirýdiń tıimdiligi men qoldanýǵa yńǵaılylyǵy eskerilip, eki tetik aıqyndalǵan.
Birinshi, negizgi tetik – eGov Mobile qosymshasyndaǵy «Tsıfrlyq qujat» servısi arqyly sáıkestendirý. Bul jaǵdaıda patsıent dárigerge biregeı túrde qalyptastyrylǵan 6 tańbaly kodty usynady. Al dáriger atalǵan kodty aqparattyq júıege engizý arqyly patsıenttiń jeke basyn sáıkestendiredi.
Ekinshi, qosymsha tetik – azamatta eGov Mobile qosymshasy ornatylǵan smartfon bolmaǵan jaǵdaıda Face ID tehnologııasyn paıdalaný arqyly sáıkestendirý.
- Face ID tehnologııasyn paıdalaný medıtsınalyq qyzmetterdi negizsiz tirkeýdiń aldyn alýǵa, medıtsınalyq uıymdardaǵy eseptiń ashyqtyǵy men dáldigin arttyrýǵa, sondaı-aq patsıentterdiń tsıfrlyq servısterge degen senimin nyǵaıtýǵa yqpal etedi. Patsıentterdi tsıfrlyq sáıkestendirý servısi Mınıstrlikpen Ádilet mınıstrligimen jáne Jasandy ıntellekt jáne tsıfrlyq damý mınıstrligimen birlesip, qoldanystaǵy tegin sheshimder negizinde ázirlendi. Atalǵan servısti ázirleýge bıýdjet qarajaty bólingen joq, – dedi Tımýr Sultanǵazıev.
Buǵan deıin patsıenttiń medıtsınalyq tarıhy barlyq medıtsınalyq uıymǵa qoljetimdi bolatynyn jazǵan edik.
