Dáriger: Ekpe pasporty joq balalar balabaqshaǵa qabyldanbaıdy
ASTANA. KAZINFORM — Qazirgi ýaqytta vaktsınatsııa kóptegen aýrýdyń taralýyna qarsy kúrestegi eń tıimdi sharalardyń biri bolyp otyr. Ýaqytynda salynbaǵan ekpe túrli saldarǵa jáne artyq qıyndyqtarǵa ákelýi múmkin, dep habarlaıdy Astana qalasy ákimdiginiń resmı saıty.
Elordadaǵy josparly ekpe naýqany týraly qalalyq № 2 emhananyń pedıatr-dárigerleri baıandady.
Dárigerlerdiń aıtýynsha, qazirgi kezde ártúrli sebeppen balalaryna ekpe saldyrýdan bas tartatyn ata-analar da kezdesedi.
— Tájirıbemde bir jaǵdaı boldy: 18 jastaǵy jigit sheteldik joǵary oqý ornyna túsýge daıyndalyp, emhanaǵa júgindi. Alaıda ol ómirinde birde-bir vaktsına almaǵan, tipti perzenthanada salynatyn BTsJ ekpesi de jasalmapty. Qujat tapsyrý kezinde ekpeler tizimi qajet bolǵan soń bizden kómek surady. Biraq ol kámelet jasyna tolǵandyqtan, kómektese almadyq. Vaktsına alǵan adam qorǵalǵan bolady. Al ekpe salynbaǵan naýqastarda juqpaly aýrý kezinde asqynýlar jıi bolyp, ókpe qabynýyna ulasýy múmkin, ókinishke qaraı, ólim jaǵdaılary da kezdesedi. Sonymen qatar mektepterde bizdiń mamandar jasóspirim qyzdarǵa adam papıllomasy vırýsyna qarsy vaktsınatsııa júrgizip jatyr. Bas tartý jaǵdaılary ázirge tirkelgen joq. Osy oraıda ata-analarǵa mynany eskertkim keledi: búginde ekpe pasporty joq balalar balabaqshaǵa qabyldanbaıdy, — dedi № 2 qalalyq emhananyń pedıatrııa bóliminiń meńgerýshisi Altyngúl Júrsinova.
Balalardy ekpege daıyndaý barysynda meıirbıkelerge mańyzdy ári jaýapty mindet júkteledi. Olar ata-analarǵa qońyraý shalyp, balalarymen birge ekpe alýǵa shaqyrady.
— Bala dúnıege kelgen sátten bastap anasymen jumys júrgizemiz, áńgimelesemiz, patronajǵa baramyz. Aradaǵy senim qalyptasady. Barlyq suraqqa ashyq ári naqty jaýap beremin. Kópshiligi dárigerdiń sózine sený kerek ekenin túsinedi. Alaıda keıde dinı nemese basqa sebeptermen balasyna ekpe saldyrǵysy kelmeıtin ata-analar da kezdesedi. Ondaı jaǵdaıda biz májbúrlemeımiz, biraq saldary týraly eskertemiz, — dedi ýchaskelik meıirbıke Asylgúl Arǵymbaeva.
Budan buryn arzan vaktsınanyń kesirinen balalar aýrýǵa shaldyǵady degen aqparatqa qatysty mınıstrlik túsinikteme bergen edi.