Dáriger balalar jıi shaldyǵatyn anemııanyń negizgi belgilerin atady

ASTANA. KAZINFORM — Anemııa júkti áıelder men balalar arasynda jıi anyqtalyp, ımmýnıtettiń álsireýine jáne sozylmaly sharshaýǵa ákeledi. Bul týraly gematolog Aıgúl Qalıeva aıtty.

— Temir tapshylyǵy — aǵzadaǵy barlyq protsesterge áser etetin mańyzdy másele. Alǵashqy belgiler baıqalsa, ýaqyt ozdyrmaı tekserilgen jón, — dedi gematolog maman Jibek Joly telearnasyndaǵy «Búgin LIVE» baǵdarlamasynda.

Mamannyń aıtýynsha, anemııanyń negizgi belgilerine álsizdik, bas aınalý, sharshaǵyshtyq jáne teriniń bozarýy jatady. Aýrýdy anyqtaý úshin tek jalpy qan taldaýy jetkiliksiz — ferrıtın, V12 dárýmeni men folıı qyshqylyn da qosymsha tekserý qajet.

Temir preparattaryn tamaqtan 2 saǵat buryn, tek sýmen qabyldaý kerek. Sút, shaı, kofe temirdiń sińýin tejeıdi. Dárigerdiń aıtýynsha, kúndelikti taǵam arqyly qajetti temir mólsherin tolyqtyrý múmkin emes — kúnine qajet 40 mg temir shamamen bes kılogramm etke teń, sondyqtan preparattar mindetti túrde qajet.

Buǵan qosa, 6 aıdan 2 jasqa deıingi balalarǵa temirge baı taǵam berý, júkti áıelderge ýaqytyly tekserýden ótý usynylady.

Aıta keteıik, elimizde balalardyń 50%-dan astamy anemııaǵa shaldyqqany jaıly jazǵan edik.

Kámılá Múlik