Darǵa asylǵan adam qaıta tirildi
ASTANA. 24 qazan. QazAqparat - Iran elinde jýyrda bir keli esirtkimen ustalǵan, eki balanyń ákesi Alı Ryzaǵa ólim jazasy berilip, oǵan sot otyrysy «darǵa asý» týraly sheshim shyǵarǵan edi. Sot úkimi osy aıdyń basynda Bodjnýrd qalasynda júzege asyp, ony darǵa asqan bolatyn.
Muslim.kz saıtynyń jazýynsha, úkim oryndalǵan sátten 12 mınýt ótken soń túrme qyzmetkerleri Alı Ryzany óldi dep máıithanaǵa aparyp tastaıdy. Alaıda, ertesi kúni máıithana qyzmetkerleri álgi adamnyń boıynan jany shyqpaǵanyn kórip tańǵalysty.
Bul habardy túrme bıligi tosyrqaı qarsy alsa, týystary shattyqqa bólendi. Biraq olardyń qýanyshy kópke sozylmady. Óıtkeni, jergilikti sot organdary onyń qaıtadan darǵa asylatynyn aıtqan edi. Bul jaǵdaıǵa Ultaralyq keshirim uıymy da aralasyp, Iran bılik organdary sot úkimin qaıta talqylaýǵa jiberedi. Nátıjesinde, keshe Iran Ádilet mınıstri Mustafa Púrmuhammad «bir márte ajal tyrnaǵynan aman qalǵan adamdy ekinshi ret darǵa asýdyń qajeti joq» dep, Alı Ryzanyń ekinshi ret darǵa asylmaıtyndyǵy týraly BAQ ókilderine málimdeme jasady.
