Dárejeli áskerı sportshylar Ońústik Koreıada ótetin Ýnıversıada - 2015-te Qazaqstannyń atynan shyǵady (FOTO)

ASTANA. QazAqparat - QR QM Armııa ortalyq sport klýbynyń jeti sportshysy Ýnıversıada - 2015-te Qazaqstannyń namysyn qorǵaıtyn bolady. Olar sporttyń eki túrinen- taekvondodan jáne dzıýdodan tartysqa túsedi, dep habarlady QR QM baspasóz qyzmeti.

Taekvondodan komanda quramynda bedeldi halyqaralyq saıystarda elimizdi birneshe márte máshhúr etken dárejeli armııalyq sportshylar bar. Olar - Qazaqstannyń chempıony, 2012 jylǵy áskerı qyzmetshiler arasyndaǵy álem chempıonatynyń qola júldegeri, kishi serjant Mereke Júnisova, QR jáne halyqaralyq týrnırlerdiń chempıony, qatardaǵy jaýynger Rýslan Japarov, sport sheberi, QR chempıony, qatardaǵy jaýynger Marat Ábdiqalıev, QR QK qyzmetkerleri - Londonda ótken Olımpıada qatysýshysy, QR chempıony Nursultan Mamaev pen sport sheberi, QR chempıony Azamat Teńizbaev. Komanda bapkeri taekvondodan Qazaqstan men Reseıdiń eki dúrkin chempıony, áskerı qyzmetshiler arasyndaǵy 1995 jylǵy álem chempıonatynyń kúmis júldegeri, kapıtan Ánýar Úsenov.

Ýnıversıadada olarǵa QR QM AOSK daryndy dzıýdoshysy, sport sheberi, dzıýdodan Qazaqstan men halyqaralyq týrnırlerdiń chempıony, qatardaǵy jaýynger Ǵumar Qyrǵyzbaev serik bolady.

Ýnıversıada - 2015 shildeniń 6-y men 16-y aralyǵynda ońtústik koreıalyq Kvandjý qalasynda ótetinin aıta keteıik. Bizdiń sportshylarymyz barynsha kóp medal jáne júldeli oryn alýǵa nıettenip otyr.