Dárethanasynan quıma altyn tabylǵan ushaq jerge shuǵyl qonǵan
ASTANA. QazAqparat - Bortynda 100-den astam jolaýshy bolǵan IndiGo úndi áýe kompanııasynyń ushaǵy dárethanasynan altyn quımalar tabylǵan sátte jerge shuǵyl qonýǵa májbúr bolǵan. Áýelde laınerdiń ekıpaj músheleri kúmándi oramada jarylǵysh zat bar dep kúdiktenip, ushaqty qondyrýǵa sheshim qabyldaǵan, dep jazady Ýtro.rý.
Sıngapýrdan Úndistannyń ońtústigindegi Chennaı qalasyna bet alyp bara jatqan ushaq Kýala-Lýmpýr áýejaıyna beısenbi kúni tańerteń shuǵyl qonýǵa májbúr bolǵan. Qutqarýshylar toby ekıpajdyń barlyq músheleri men jolaýshylardy salonnan shyǵaryp jiberip, ushaq bortynan tabylǵan paketti ashyp teksergen. Odan jalpy salmaǵy bir kılogrammǵa jeter-jetpes altyn tústes úsh quıma kesek tabylǵan.
Mamandardyń aıtýynsha, tabylǵan kesekter altyn quımalar tárizdi, biraq, bul málimet ázirge resmı túrde rastalǵan joq.
Quımalardyń ıesi ázirge tabylmady. Jergilikti polıtsııa qyzmetkerleri oramany dárethanadan jolaýshylar ushaqtan shyǵarylǵannan keıin alyp shyqqandyqtan, olar eshkimnen jaýap ala almady. Tekserý aıaqtalǵan soń ushaq óz saparyn jalǵastyryp, Úndistanǵa qaraı bet aldy. Tergeý jumystary jalǵasýda.
Úndistanǵa altyn tasymaldaý úshin kontrabandashylar ushaqtardyń dárethanalaryn jıi paıdalanatynyn aıta ketken jón. Quqyq qorǵaý organdarynyń ókilderi bolsa, altyn kontrabandasynyń jıileýin osy baǵaly metaldy Úndistanǵa tasymaldaý salyǵynyń 10%-ǵa deıin kóterilýimen baılanystyrady. Álemdegi altyndy kóp tutynatyn negizgi elderdiń biri bolyp sanalatyn bul elde (2013 jyldyń alǵashqy úsh toqsanynda munda altyndy tutyný mólsheri 715 tonnaǵa jetken) onyń ımporttalýyn zańmen shekteý altynnyń zańsyz tasymaldanýy oqıǵalaryn arttyryp otyr.
